पुणे: गेले सरते वर्ष, गेला तो काळ, नवीन आशा-अपेक्षा घेऊनी आले नवीन साल, नवीन वर्षाच्या हार्दिक शुभेच्छा... असे म्हणत पुणेकर नवीन वर्षाचे स्वागत करण्यासाठी सज्ज आहेत. सरत्या वर्षाला निरोप देत पुणेकर नवीन वर्षाचे जोरदार स्वागत करणार असून, बुधवारी (दि. 31 डिसेंबर) रात्री दहा वाजल्यानंतर शहर आणि उपनगरांत न्यू इअरच्या सेलिबेशनचा मूड पाहायला मिळणार आहे.
कोरेगाव पार्क असो वा फर्ग्युसन महाविद्यालय रस्ता... कॅम्प असो वा विमाननगर... ठिकठिकाणी न्यू इअर पार्टी रंगणार असून, हॉटेल्स, रेस्टॉरंट, रिसॉर्ट अन् विविध क्लबमध्ये न्यू इअर पार्टी होणार आहे. काहीजण घरीच हाऊस पार्टी करणार असून, काहीजणांनी फिरायला जाण्याचे निमित्त साधले आहे. सरत्या वर्षातील चांगल्या गोष्टी अन् आठवणी साठवत नवीन वर्षाचे स्वागत जल्लोषात करण्यासाठी पुणेकर सज्ज आहेत. तरुणाई न्यू इअर पार्टीत सहभागी होत न्यू इअरचे सेलिबेशन करणार आहे. विविध खाद्यपदार्थांचा आस्वाद घेत अन् लाइव्ह म्युझिक बॅण्ड अन् डीजेच्या तालावर थिरकत नवीन वर्षाचे स्वागत होणार आहे.
पुण्यातील रस्ते विद्युत रोषणाईने उजळले आहे. बुधवारी रात्री दहानंतर या पार्टी सुरू होणार असून, त्यासाठीचे नियोजनही हॉटेल्स-रेस्टॉरंट मालकांनी केले आहे. येथे विविध रंगांची फुले, विद्युत रोषणाई अन् ‘हॅप्पी न्यू इअर’चे फलक लावलेले पाहायला मिळत आहेत. काहींनी नवीन वर्षासाठी घरांमध्ये पार्टीचे नियोजन केले आहे. घराघरांत बिर्याणीसह विविध खाद्यपदार्थांचा आस्वाद घेत संगीताचे कार्यक्रम आणि कुटुंबीयांसमवेत पार्टीचा आनंद घेण्यात येणार आहेत, तर काहींनी कुटुंबीयांसोबत मुळशी, लोणावळा, पानशेत आदी ठिकाणे गाठली आहेत. तरुणाईने मित्र-मैत्रिणींबरोबर पबमध्ये जाऊन नववर्षाचे स्वागत करण्याचे ठरविले आहे. पुण्यातील मॉलमध्येही नवीन वर्षाचे वातावरण पाहायला मिळत असून, खास सजावटही केली आहे.
डेक्कन परिसर, कोरेगाव पार्क, जंगली महाराज रस्ता, कॅम्प, विमाननगर, हिंजवडी, बाणेर, बावधन, फर्ग्युसन रस्ता, प्रभात रस्ता, कोथरूड, औंध आदी ठिकाणच्या हॉटेल्स, रेस्टॉरंट, पबमध्ये मोठ्या प्रमाणात बुकिंग झाली आहे. याशिवाय पुणे शहराजवळ असलेल्या रिसॉर्टमध्ये न्यू इअर पार्टीत डीजे सादरीकरण, बिर्याणीसह विविध खाद्यपदार्थांची मेजवानी अन् विविध गेम्स... असे काहीशी तयारी करण्यात आली आहे.
नवीन वर्षाचे स्वागत करण्यासाठी तरुणाई सज्ज असून, पुण्यातील हॉटेल्स, रेस्टॉरंट, पब, क्लबहाऊस, फार्महाऊस अन् रिसॉर्टमध्ये बुकिंग झाले आहे. सर्वच ठिकाणी लाइव्ह म्युझिक बँड, डीजे नाइट, सुफी-गझल नाइटसह विविध खाद्यपदार्थांसह विविध कार्यक्रमांचे आयोजन केले असून, रात्री बारा वाजता खास पद्धतीने नवीन वर्षाचे स्वागत होणार आहे, तर काहींनी घरीच सेलिबेशन करण्याचे नियोजन केले असून, घरोघरी विविध थीमनुसार हाऊस पार्टीही रंगणार आहे. त्यामुळे खाद्यपदार्थांच्या पार्सललाही मोठी मागणी आहे. बिर्याणीला सर्वाधिक मागणी आहे. हॉटेल्स, रेस्टॉरंट, पब, क्लबहाऊस अन् रिसॉर्टकडून वेगवेगळ्या सवलतीही देण्यात आल्या आहेत.
किशोर सरपोतदार, अध्यक्ष, पुणे रेस्टॉरंट आणि केटरिंग असोसिएशन
