पुणे: डस्टबिनमध्ये फाडून टाकलेल्या कागदाचे कपटे जोडताच विवाहितेच्या आत्महत्येमागील प्रकार उघडकीस आला आहे. तिला ब्लॅकमेल केले जात असल्यानेच तिने आत्महत्येचे पाऊल उचलल्याचे समोर आले.
जुनी छायाचित्रे व्हायरल होण्याची भीती व मानसिक छळामुळे त्रस्त झालेल्या 27 वर्षीय महिलेने गळफास घेऊन आत्महत्या केल्याची घटना चंदननगर परिसरात घडली होती. या प्रकरणी करण शिंदेविरुद्ध गुन्हा दाखल करण्यात आला आहे. रेखा नाव बदललेले (वय 27) असे मृत महिलेचे नाव आहे. याबाबत तिच्या भावाने चंदननगर पोलिस ठाण्यात फिर्याद दिली आहे. पोलिसांच्या माहितीनुसार, रेखाचे लग्न 2016 मध्ये झाले होते. तिला एक मुलगा आहे. ती पुण्यात एका कंपनीत रिसेप्शनिस्ट म्हणून काम करीत होती.
करण शिंदे हा रेखाच्या परिचयात असून, सप्टेंबर ते डिसेंबर 2024 दरम्यान तो त्यांच्या घरी वास्तव्यास होता. याच काळात त्याने रेखाला प्रेमाच्या जाळ्यात ओढल्याचा आरोप आहे. हा प्रकार उघडकीस आल्यानंतर पती-पत्नीमध्ये वाद झाले आणि करणला घराबाहेर काढण्यात आले. दरम्यान, काही काळानंतर पती-पत्नी पुन्हा एकत्र राहू लागले. मात्र, रेखा आणि करण संपर्कात असल्याचे पुन्हा समोर आल्याने दोघांमध्ये वाद वाढले. सप्टेंबर 2025 मध्ये रेखा मुलासह माहेरी राहू लागली. पोलिस तपासात समोर आले की, रेखाला आपल्या चुकीची जाणीव झाली होती. तिने करणशी संबंध तोडून पुन्हा संसार सुरू करण्याचा निर्णय घेतला होता.
मात्र, करण तिला तसे करू देत नव्हता. जुने फोटो व्हायरल करण्याची धमकी देत तो पैशांची मागणी करीत होता. सततच्या धमक्यांमुळे आणि मानसिक तणावामुळे रेखा नैराश्यात गेली होती. 9 फेबुवारीला रात्री 8 च्या सुमारास ती घरात एकटी असताना गळफास घेतला. दरवाजा न उघडल्याने नातेवाइकांनी दरवाजा तोडला असता ती मृतावस्थेत आढळली. या आत्महत्येचा तपास चंदननगर पोलिस करीत असतानाच तपासादरम्यान पोलिसांच्या हाती महत्त्वपूर्ण पुरावा लागला. सुसाइड नोट व इतर पुराव्यांच्या आधारे चंदननगर पोलिसांनी आरोपीविरुद्ध गुन्हा दाखल करून पुढील तपास सुरू केला आहे.
ऑफिसमधील डस्टबिनमध्ये सापडली फाडलेली चिठ्ठी
तपासादरम्यान रेखा ज्या ऑफिसमध्ये स्वागतिका म्हणून काम करीत होती. त्या तिच्या ऑफिसमधील डस्टबिनमध्ये फाडलेली चिठ्ठी पोलिसांना सापडली. पोलिसांनी पारदर्शक टेपच्या साहाय्याने ती जोडून वाचली असता, ब्लॅकमेलिंगचा संपूर्ण प्रकार उघड झाला. सुसाईड नोटमध्ये तिने करण शिंदे सातत्याने धमक्या देत असल्याचे, पैशांची मागणी करीत असल्याचे नमूद केले होते. तसेच, मोबाईलमध्ये कॉल रेकॉर्डिंग आणि व्यवहारांचे पुरावे असल्याचेही लिहिले आहे.
