पुणे: शेडमध्ये झोपलेल्या आठ वर्षीय मुलीच्या अंगावरून मोटार गेल्याने तिचा मृत्यू झाला. ही घटना शुक्रवारी (दि.03) दुपारी साडेबारा वाजताच्या सुमारास मौजे वढु खुर्द, रामनगर, लेन क्रमांक चार येथील परिसरात घडली आहे. मोटार शेडमध्ये लावत असताना हा अपघात झाला आहे. मैराबी रसुलसाब बळीगर (वय 9) असे मृत्यू झालेल्या मुलीचे नाव आहे.
याप्रकरणी लालसाहेब महमंदसाब कालेगार (वय 39, रा. लोणीकंद, मूळ जुमलापूर, कर्नाटक) यांनी लोणीकंद पोलिस ठाण्यात फिर्याद दिली आहे. त्यानुसार पोलिसांनी मोटारचालक भरत रमेश नेहेते (वय 46, रा. रामनगर, वढू खुर्द) याच्याविरुद्ध मुलीच्या मृत्यूस कारणीभूत झाल्याचा गुन्हा दाखल केला आहे. पोलिसांनी दिलेल्या माहितीनुसार, मैराबी हिचे आई-वडील मजूर आहेत. वढू खुर्द येथील एका इमारतीचे बांधकाम सुरू असून तेथे ते बांधकाम मजूर म्हणून काम करत होते.
मैराबी ही बांधकामाजवळ असलेल्या पत्र्याच्या शेडमध्ये झोपली होती. दरम्यान, नेहेते हे त्यांच्याकडील मोटार शेडमध्ये पार्क करत होते. त्या वेळी अंधार असल्याने शेडमध्ये मैराबी झोपली असल्याचे त्यांच्या लक्षात आले नाही. तिच्या अंगावरून चारचाकी गेल्याने ती गंभीर जखमी झाली. त्यानंतर तिला रुग्णालयात दाखल केले असता डॉक्टरांनी तिला मृत घोषित केले.
