पुणे: शहरात वेगवेगळ्या अपघातांत दोघांचा मृत्यू झाल्याची घटना घडली. पुणे-सोलापूर रस्ता तसेच उंड्री परिसरात अपघाताच्या घटना घडल्या. पुणे-सोलापूर रस्त्यावरील कुंजीरवाडी परिसरात ट्रकवर आदळून टेम्पो चालकाचा मृत्यू झाल्याची घटना घडली.
नल्लाबेल्ली नागेश्वरराव (वय ५०, रा. पुडी, विशाखापट्टणम, आंध्र प्रदेश) असे मृत्युमुखी पडलेल्या टेम्पोचालकाचे नाव आहे. याबाबत ट्रकचालक मोहम्मद हनीफ ख्वाजामियाँ शेख (वय ३८, रा. बार्शी, जि. सोलापूर) याने लोणी काळभोर पोलिस ठाण्यात फिर्याद दिली आहे.
शुक्रवारी (२४ जुलै) पहाटे चारच्या सुमारास पुणे-सोलापूर रस्त्यावरून भरधाव टेम्पो निघाला होता. लोणी काळभोर भागातील कुंजीरवाडी परिसरात टेम्पो पाठीमागून ट्रकवर आदळला. ट्रकवर टेम्पो आदळल्यानंतर पाठीमागून येणारी जीप ट्रकवर आदळली. अपघातात गंभीर जखमी झालेल्या नल्लाबेल्ली याला तातडीने रुग्णालयात दाखल करण्यात आले.
उपचारांपूर्वीच त्याचा मृत्यू झाला होता. पोलिस उपनिरीक्षक योगेश पैठणे तपास करीत आहेत. कात्रज-मंतरवाडी बाह्यवळण मार्गावर उंड्री परिसरात भरधाव डंपरच्या धडकेत रूपेश दिलीप बनसोडे ( रा. वारजे माळवाडी) या दुचाकीस्वाराचा मृत्यू झाल्याची घटना शुक्रवारी (दि. २४ जुलै) सकाळी नऊच्या सुमारास घडली.
याप्रकरणी डंपरचालक साईराज संभाजी शितोळे (वय २५, रा. भूमकर चौक, वाकड) याला अटक केली. बनसोडे याचा भाऊ योगेश दिलीप बनसोडे (वय ३३) याने काळेपडळ पोलिस ठाण्यात फिर्याद दिली आहे. सहाय्यक पोलिस निरीक्षक अमित शेटे तपास करीत आहेत.
