पुणे विमानतळावरून दररोज 180 ते 190 च्या घरात विमानोड्डाणे होतात. त्याद्वारे 25 ते 30 हजार प्रवासी दररोज येथून ये-जा करतात. त्यांच्या माध्यमातून शासनाला भरघोस महसूल मिळतो. मात्र, अद्याप येथील नागरिकांना म्हणाव्या, तशा सुविधा उपलब्ध झालेल्या नाहीत, अशी खंत अनेक प्रवासी व्यक्त करीत आहेत. त्यातच पुणेकरांना पुण्यातून थेट परदेशात प्रवास करता येत नाही, हीदेखील असुविधाच आहे. त्यांना आंतरराष्ट्रीय प्रवासासाठी थेट मुंबई किंवा दिल्ली गाठावी लागत आहे. तेथूनच त्यांना परदेशात जाण्यासाठी विमानाने प्रवास करता येतो. आगामी काळात असे न करता आम्हाला पुण्यातूनच थेट आंतरराष्ट्रीय कनेक्टिव्हिटी मिळावी, अशी मागणी पुणेकरांकडून केली जात आहे.
