पुणे: पुणे महापालिका निवडणुकीच्या पार्श्वभूमीवर दोन्ही राष्ट्रवादी काँग्रेस एकत्र येण्याबाबत सकारात्मक चर्चा सुरू आहे. दोन्ही राष्ट्रवादी काँग्रेस महाविकास आघाडीसोबत एकत्र निवडणूक लढण्याबाबत चर्चा करत आहोत. आघाडीतील घटक पक्षांसोबत यासंदर्भात आज उशिरा बैठक होईल, अशी माहिती राष्ट्रवादी काँग्रेस शरद पवार पक्षाचे प्रवक्ते अंकुश काकडे यांनी दिली.
आगामी निवडणुकीच्या पार्श्वभूमीवर दोन्ही राष्ट्रवादी काँग्रेस एकत्र निवडणूक लढवण्याच्या हालचाली सुरू आहेत. उपमुख्यमंत्री अजित पवार यांनी देखील काँग्रेसचे निरीक्षक माजी मंत्री सतेज पाटील यांच्यासोबत आघाडी म्हणून पुणे महापालिकेत एकत्र निवडणूक लढवण्याबाबत प्राथमिक चर्चा केली आहे. तर राष्ट्रवादी काँग्रेस शरद पवार गटाचे नेते ऍड. वंदना चव्हाण, अंकुश काकडे आणि विशाल तांबे तर राष्ट्रवादी अजित पवार गटाचे नेते आमदार चेतन तुपे, शहर अध्यक्ष सुनील टिंगरे आणि सुभाष जगताप अशी आज बैठक झाली.
दोन्ही राष्ट्रवादी एकत्र लढण्याबाबत सकारात्मक चर्चा झाली आहे. दोन्ही राष्ट्रवादी आणि महाविकास आघाडीतील मित्र पक्षांसोबत मिळून निवडणूक लढवण्याबाबत देखील सकारात्मक चर्चा झाली आहे. मित्र पक्षाच्या प्रमुखांशीही बोलणार आहोत.
हा निर्णय स्थानिक पातळीवरील आहे. राष्ट्रवादी काँग्रेस एकत्रित ल ढल्यावर कोणत्या चिन्हावर लढायच हा निर्णय वरिष्ठ स्तरावर घेतला जाईल, असे काकडे यांनी स्पष्ट केले.
प्रशांत जगताप यांनी शहर अध्यक्ष पदाचा राजीनामा दिलेला नाही. आज त्यांना बैठकीला बोलावले होते. ते मुंबईला असल्याने बैठकीला येऊ शकले नाहीत. पक्षाचे वरिष्ट नेते जगताप यांच्याशी संवाद साधत आहेत. ते आमच्यासोबत राहतील असा आम्हाला विश्वास वाटतो.
