पुणे: खेळण्याचे असताना १५ वर्षीय अल्पवयीन मुलीने घरात एकटीने प्रसूती केल्याची हृदयद्रावक घटना पुण्यातील समर्थ पोलीस ठाण्याच्या हद्दीत घडली. कोणतीही वैद्यकीय मदत नसताना वेदनांनी विव्हळलेल्या या मुलीने स्वतःच नवजात बाळाची नाळ कापल्याचा धक्कादायक प्रकार समोर आला आहे.
या प्रकरणी आदिल शेख (२४) याच्याविरोधात पोक्सो कायद्यान्वये गुन्हा दाखल करण्यात आला आहे. मार्च २०२५ ते ३१ जानेवारी २०२६ या कालावधीत हा प्रकार घडल्याचे फिर्यादीत नमूद आहे. ३१ जानेवारी रोजी सकाळी साडेअकराच्या सुमारास विवाहित मोठी बहीण माहेरी आली असता घराचा दरवाजा आतून बंद होता.
काही वेळाने भाऊ आल्यानंतर आवाज दिल्यावर दरवाजा उघडण्यात आला. घरात प्रवेश करताच फरशीवर आणि दरवाजाजवळ रक्ताचे डाग दिसून आले. खिडकीजवळ कापडात गुंडाळलेले नवजात बाळ दिसले. याप्रकारामुळे कुटुंबीयांना धक्काच बसला. तिला विश्वासात घेऊन विचारणा केल्यावर मुलीने घरातच प्रसूती झाल्याचे सांगितले.
नाळ कोणी कापली, असे विचारल्यावर तिनेच स्वतः ती कापल्याची कबुली दिली. वेदना, भीती आणि सामाजिक दबावाच्या छायेत तिने एकटीने हा प्रसंग झेलल्याचे उघड झाले. नंतर आई व आत्यासमोर मुलीने गेल्या वर्षभरापासून आदिल शेख याच्याशी प्रेमसंबंध असल्याचे सांगितले. या काळात दोन ते तीन वेळा शारीरिक संबंध झाल्याचेही तिने नमूद केल्याचे फिर्यादीत म्हटले आहे.
अल्पवयीन असल्याने हा संबंध कायद्याने गुन्हा ठरत असून, पोलिसांनी तत्काळ गुन्हा दाखल केला आहे. सध्या आई आणि नवजात बाळ दोघांवरही रुग्णालयात उपचार सुरू आहेत. वैद्यकीय तपासणीनंतर पुढील कायदेशीर कारवाई होणार आहे. पोलिस उपनिरीक्षक निकिता उईके या तपास करत आहेत.
