पुणे: पुणेकरांसाठी यंदाचा गणेशोत्सव अधिक सोयीचा होणार आहे. महाराष्ट्र शासनाने गणेशोत्सवाला ‘राज्योत्सव’ म्हणून मान्यता दिल्यानंतर, पुणे मेट्रोने या उत्साहाला अधिक गती देण्यासाठी महत्त्वाचा निर्णय घेतला आहे. यंदाच्या गणेशोत्सवासाठी पुणे मेट्रोच्या प्रवासी सेवेची वेळ वाढविण्यात आली असून, यामुळे पुणेकरांना मध्यवर्ती पुण्यातील वाहतूक कोंडीतून मोठा दिलासा मिळणार आहे.
पुण्यात गणेशोत्सव मोठ्या प्रमाणावर साजरा होतो आणि या काळात शहरात देशभरातूनच नव्हे, तर जगभरातून लाखो भाविक येतात. यावर्षी पुणे मेट्रोच्या ‘जिल्हा न्यायालय ते स्वारगेट’ या नवीन भूमिगत मार्गामुळे प्रवासाचा नवा पर्याय उपलब्ध झाला आहे.
गणेशोत्सवातील पुणे मेट्रोचे विशेष वेळापत्रक
27 ऑगस्ट ते 29 ऑगस्ट (पहिले तीन दिवस) :- नेहमीप्रमाणे सकाळी 6 ते रात्री 11 पर्यंत मेट्रो सेवा सुरू राहील.
30 ऑगस्ट ते 5 सप्टेंबर :- मेट्रोची सेवा मध्यरात्री 2 वाजेपर्यंत वाढवण्यात आली आहे, जेणेकरून भाविकांना रात्री उशिरापर्यंत गणपती दर्शनाचा आणि देखावे पहाता येणार आहेत.
अनंत चतुर्दशी (6 सप्टेंबर) :- या दिवशी मेट्रो सेवा 41 तास अखंड सुरू राहणार आहे. म्हणजेच, 6 सप्टेंबर रोजी सकाळी 6 पासून ते 7 सप्टेंबर रोजी रात्री 11 पर्यंत मेट्रो धावत राहील. यामुळे विसर्जन मिरवणुकीसाठी येणार्या भाविकांना मोठा फायदा होईल.
