शंकर कवडे
पुणे: मध्य प्रदेशपाठोपाठ राजस्थान येथील मटारचा हंगाम सुरू झाल्याने बाजारात मटारची आवक वाढू लागली आहे. रविवारी पुणे कृषी उत्पन्न बाजार समितीच्या गुलटेकडी येथील मार्केट यार्डात तब्बल 41 टेम्पोंमधून मटार विक्रीसाठी दाखल झाला. मध्य प्रदेश येथून 40, तर राजस्थान येथून एका टेम्पोतून झालेली ही आवक आत्तापर्यंतची विक्रमी ठरली. रविवारी घाऊक बाजारात मटारला किलोला 22 ते 28 रुपये भाव मिळाला, तर किरकोळ बाजारात 50 ते 60 रुपये किलो दराने मटारची विक्री सुरू होती.
घाऊक बाजारामध्ये राज्याच्या विविध भागांसह परराज्यांतून मिळून सुमारे 110 ट्रक फळभाज्यांची आवक झाली होती. त्या तुलनेत मागणी कमी असल्यामुळे कोबी, फ्लॉवर, वांगी आणि घेवड्याच्या भावात दहा ते पंधरा टक्क्यांनी घट झाली आहे. तर, आवकेच्या तुलनेत मागणी जास्त असल्यामुळे ढोबळी मिरची, हिरव्या मिरचीच्या भावात दहा टक्क्यांनी वाढ झाली आहे. नव्या कांद्याची आवक वाढत चालली आहे. मागणी आणि पुरवठा यातील समतोलामुळे उर्वरित सर्व प्रकारच्या फळभाज्यांचे भाव स्थिर असल्याची माहिती ज्येष्ठ अडतदार विलास भुजबळ यांनी दिली.
परराज्यांतून झालेल्या आवकेमध्ये कर्नाटक, उत्तर प्रदेश, गुजरात येथून हिरवी मिरची सुमारे 14 ते 15 टेम्पो, कर्नाटक येथून कोबी 4 ते 5 टेम्पो, आंध्र प्रदेश आणि तामिळनाडू येथून शेवगा 2 टेम्पो, राजस्थान येथून गाजर सुमारे 10 ते 12 टेम्पो, कर्नाटक येथून घेवडा 4 ते 5 टेम्पो, कर्नाटकातून भुईमूग 2 टेम्पो, कर्नाटक येथून पावटा 3 टेम्पो, तामिळनाडू येथून तोतापुरी कैरी 3 टेम्पो, मध्य प्रदेश येथून लसणाची सुमारे 8 ते 10 टेम्पो तर इंदूर, आग्रा, स्थानिक भागातून मिळून बटाट्याची 45 ते 50 टेम्पो आवक झाली.
स्थानिक भागातून झालेल्या आवकेमध्ये सातारी आले सुमारे 400 ते 450 गोणी, भेंडी सुमारे 7 ते 8 टेम्पो, कोबी 6 ते 7 टेम्पो, हिरवी मिरची 4 ते 5 टेम्पो, गवार 4 ते 5 टेम्पो, टोमॅटो 7 ते 8 हजार क्रेट, काकडी 7 ते 8 टेम्पो, फ्लॉवर 14 ते 15 टेम्पो, ढोबळी मिरची 8 ते 10 टेम्पो, तांबडा भोपळा सुमारे 10 ते 12 टेम्पो, गाजर 3 ते 4 टेम्पो, घेवडा प्रत्येकी 4 टेम्पो, पावटा 2 ते 3 टेम्पो, नवीन आणि जुन्या कांद्याची मिळून सुमारे 125 टेम्पो आवक झाली. पुणे कृषी उत्पन्न बाजार समितीच्या गुलटेकडी मार्केट यार्डात विक्रीसाठी दाखल झालेला मटार.
पालेभाज्यांच्या भावात घट
मार्केट यार्डात पालेभाज्यांची आवक वाढली आहे. त्या तुलनेत मागणी कमी असल्यामुळे बहुतांश पालेभाज्यांच्या भावात घट झाला आहे. सर्वाधिक कोथिंबीर, पालक, मुळे आणि हरभरा गड्डीच्या भावात घाऊक बाजारात जुडीमागे प्रत्येकी 5 रुपयांनी घट झाली. तर, पुदिन्याच्या भावात 3 रुपये आणि मेथी, शेपू, चाकवत, राजगिराच्या भावात जुडीमागे प्रत्येकी 2 रुपयांनी वाढ झाली. मागणी आणि पुरवठा यातील समतोलामुळे उर्वरित पालेभाज्यांचे भाव मागील आठवड्याच्या तुलनेत स्थिर आहेत. बाजारात मेथीची मोठी आवक झाली. तब्बल दीड लाख जुडी आवक झाली. ही आवक मागील आठवड्याच्या तुलनेने 50 हजारांनी जास्त आहे. कोथिंबिरीची आवक स्थिर असून, दीड लाख जुडी आवक झाली. तर, हरभरा गड्डीची आवक वाढली आहे. 20 हजार जुडीची आवक झाली. कोथिंबिरीला घाऊक बाजारात दर्जानुसार 5 ते 10 रुपये भाव मिळाला.
