Pune Market Update: बटाटा स्वस्त; अन्य फळभाज्यांचे भाव स्थिर

शंकर कवडे

पुणे: आषाढी एकादशीच्या पार्श्वभूमीवर पुणे कृषी उत्पन्न बाजार समितीच्या गुलटेकडी मार्केट यार्डातील तरकारी विभागात मागील आठवड्यात उत्तर प्रदेशासह मध्यप्रदेशातून बटाट्याची मोठी आवक राहिली. शुक्रवारी त्याला मागणीही चांगली असल्याने बटाट्याचे दर तेजीत होते. मात्र, रविवारीही वाढलेली आवक कायम राहिली.

त्यातुलनेत मागणी नसल्याने घाऊक बाजारात बटाट्याच्या दरात दहा टक्क्यांनी घसरण झाली. रविवारी बाजारात बटाट्याच्या किलोला 14 ते 20 रुपये दर मिळाला. तर, किरकोळ बाजारात 35 ते 40 रुपये किलो दराने बटाट्याची विक्री सुरू आहे. (Latest Pune News)

बाजारात रविवारी (दि. 6) राज्याच्या विविध भागांसह परराज्यांतून मिळून सुमारे 80 ते 90 ट्रक इतकी फळभाज्यांची आवक झाली. यामध्ये परराज्यांतून झालेल्या आवकमध्ये कर्नाटक आणि गुजरात येथून कोबी 3 ते 4 टेम्पो, आंध्र प्रदेश आणि तामिळनाडू येथून शेवगा 3 ते 4 टेम्पो, इंदौर येथून गाजर 9 ते 10 टेम्पो, कर्नाटक येथून घेवडा 2 ते 3 टेम्पो, हिमाचल प्रदेश 3 टेम्पो मटार, आंध्रप्रदेश आणि तामिळनाडू येथून कैरी 2 ते 3 टेम्पो, मध्यप्रदेश येथून लसूणाची सुमारे 9 ते 10 टेम्पो तर इंदौर, आग्रा, स्थानिक भागातून मिळून बटाट्याची 40 ते 45 टेम्पो यांचा समावेश आहे.

स्थानिक भागातून झालेल्या आवकमध्ये सातारी आले सुमारे 400 ते 500 गोणी, भेंडी 6 ते 7 टेम्पो, गवार 6 ते 7 टेम्पो, टोमॅटो 8 ते 10 हजार क्रेटस, हिरवी मिरची 3 ते 4 टेम्पो, काकडी 5 ते 6 टेम्पो, फ्लॉवर 8 ते 10 टेम्पो, कोबी 5 ते 6 टेम्पो, ढोबळी मिरची 7 ते 8 टेम्पो, भुईमुग शेंग 100 ते 125 गोणी, तांबडा भोपळा 10 ते 12 टेम्पो, कांदा सुमारे 75 ते 80 टेम्पो इतकी आवक झाली.

कोथिंबिर, कांदापात महाग; शेपू, पालक स्वस्त

मार्केट यार्डात कोथिंबिरीची आवक घटली आहे. मागील आठवड्यात येथील घाऊक बाजारात दीड लाख जुडी झालेली आवक आज (दि.6) एक लाख जुडी नोंदविण्यात आली. त्यामुळे घाऊक बाजारात जुडीच्या भावात 5 रुपयांनी वाढ झाली आहे. दर्जानुसार जुडीस 10 ते 20 रुपये भाव मिळत आहे. तर कांदापातच्या भावात जुडीमागे 3 रुपयांनी वाढ झाली आहे. मात्र, आवकच्या तुलनेत मागणी कमी असल्यामुळे कांदापात आणि पालकच्या भावात जुडीमागे प्रत्येकी 3 रुपयांनी घट झाली आहे. मागणी आणि पुरवठा यातील समतोलामुळे उर्वरित पालेभाज्यांचे भाव मागील आठवड्याच्या तुलनेत स्थिर असल्याची माहिती व्यापार्‍यांनी दिली.