Pune Junnar Farmer Arrested Cannabis
नारायणगाव : जुन्नर तालुक्यातील तांबे गावात गांजाची बेकायदेशीर लागवड करणाऱ्या एका शेतकऱ्याविरुद्ध जुन्नर पोलिसांनी कारवाई करत सुमारे १ किलो ९०० ग्रॅम वजनाचा गांजा जप्त केला आहे. या प्रकरणी संबंधित शेतकऱ्याविरुद्ध गुंगीकारक औषधी द्रव्ये व मनोव्यापारावर परिणाम करणारे पदार्थ (एनडीपीएस) अधिनियमांतर्गत गुन्हा दाखल करण्यात आला आहे.
पोलिसांनी दिलेल्या माहितीनुसार, १ जुलै २०२६ रोजी सायंकाळी सुमारे ४.४० वाजण्याच्या सुमारास तांबे येथील मुरलीधर धोंडु जोशी यांच्या घराशेजारील शेतामध्ये हिरव्या रंगाच्या नेटच्या आड गांजाच्या झाडांची लागवड करण्यात आल्याची गोपनीय माहिती पोलिसांना मिळाली होती. त्यानुसार पोलिसांनी घटनास्थळी छापा टाकला असता गांजाची झाडे आढळून आली.
Puneया कारवाईत एकूण १ किलो ९०० ग्रॅम वजनाचा गांजा जप्त करण्यात आला. याप्रकरणी मुरलीधर धोंडु जोशी (रा. तांबे, आंबेदरा वाडी, ता. जुन्नर, जि. पुणे) यांच्याविरुद्ध एनडीपीएस अधिनियम, १९८५ मधील कलम २० (ब) (ii) (अ) व ८ (ब) अन्वये गुन्हा दाखल करण्यात आला असून आरोपीला ताब्यात घेण्यात आले आहे. पुढील तपास जुन्नर पोलीस करत आहेत.
ही कारवाई सहाय्यक पोलीस निरीक्षक संदीप मोरे यांच्या मार्गदर्शनाखाली सहायक फौजदार गिजरे, हवालदार महेश भालेराव तसेच पोलीस शिपाई दादा पावडे, अमोल सातपुते, कैलास केंद्रे, श्रीराम शिंदे आणि दीपक वणवे यांच्या पथकाने केली.
पुणे ग्रामीण पोलीस अधीक्षक यांच्या आदेशानुसार जुन्नर तालुक्यात अंमली पदार्थांची लागवड, साठवणूक व विक्री रोखण्यासाठी विशेष मोहीम सुरू असून अशा बेकायदेशीर कृत्यांविरोधात यापुढेही कठोर कारवाई सुरू राहणार असल्याचे पोलिसांनी सांगितले.
