पुणे: आखाती देशातील कच्चा देलाच्या व्यवसायामधील गुंतवणुकीवर दरमहा पाच ते दहा टक्के परतावा देण्याचे प्रलोभन दाखवत १० जणांची २ कोटी ७४ लाख ९४ हजार रुपयांची फसवणूक केल्याचा प्रकार समोर आला आहे.
याप्रकरणी, कोंढवा पोलिसांनी गोहर उल इमान अंगोलकर, फराहदिबा अंगोलकर, (रा. दोघे बेलगम कर्नाटक), साजिद अनिफ नावडेकर, शाहीद अनिफ नावडेकर (रा. दोघे पनवेल रायगड) या चौघांविरुद्ध फसवणूक, महाराष्ट्र ठेवीदारांच्या हिताचे संरक्षण (आर्थिक आस्थापनांमध्ये) अधिनियमानुसार गुन्हा दाखल केला आहे. याबाबत सुमीत भरत नानावटी (वय ३८, रा. कोंढवा) यांनी फिर्याद दिली आहे. हा प्रकार २०२३ ते २१ ऑगस्ट २०२६ दरम्यानच्या कालावधीत घडला आहे.
गोहर उल इमान अंगोलकर हा आखाती देशातून कच्चे तेल विकत घेऊन ते भारत उपखंड, आफ्रिका, युरोप या देशात विक्री करतो. तेलाच्या भावात होणाऱ्या चढ-उतारामुळे त्याच्या कंपनीला मोठा फायदा होतो.
त्याच्या कंपनीत जर तुम्ही गुंतवणूक केली, तर महिना पाच ते दहा टक्के परतावा मिळेल, असे प्रलोभन आरोपी साजिद आणि शाहीद या दोघांनी फिर्यादींना दाखवले. तसेच एक वर्षानंतर गुंतवणूक केलेली रक्कम देखील परत मिळेल, असे सांगत आरोपींनी फिर्यादी व इतर नऊ जण अशा १० जणांकडून गुंतवणुकीच्या बहाण्याने ४ कोटी ९ लाख ९४ हजार रुपये घेतले.
त्यापैकी एक कोटी ३५ लाख रुपये त्यांना परत केले. मात्र, राहिलेले २ कोटी ७४ लाख ९४ हजार रुपये परत केले नसल्याचे फिर्यादीत म्हटले आहे. पुढील तपास वरिष्ठ पोलिस निरीक्षक खेतमाळस करत आहेत.
