पुणे: शहरात दोन वेगवेगळ्या प्रकरणांत बोगस डॉक्टरवर वारजे माळवाडी आणि चंदननगर पोलिस ठाण्यात गुन्हे दाखल करण्यात आले आहेत. पहिल्या गुन्ह्यात वैद्यकीय व्यवसायासाठी आवश्यक शैक्षणिक पदवी आणि वैद्यकीय परिषदेचे नोंदणी प्रमाणपत्र नसताना नावापुढे ‘डॉक्टर’ पदवी लावून रुग्णांवर अॅलोपॅथी उपचार केल्याचा प्रकार वारजे माळवाडीत उघडकीस आला.
संबंधित व्यक्ती नॅचरोपॅथीचा व्यवसाय करत असतानाही नागरिकांना अॅलोपॅथी औषधे देत असल्याचे तपासात समोर आले. याप्रकरणी उद्धव चव्हाण यांच्यावर वारजे माळवाडी पोलिस ठाण्यात गुन्हा दाखल केला आहे.
याबाबत डॉ. गणेश अंबादास दमाळे (वय ३९, रा. संस्कृती सोसायटी, वाकड) यांनी फिर्याद दिली आहे. पोलिसांच्या माहितीनुसार, दि. ७ सप्टेंबर २०२५ ते दि. ९ सप्टेंबर २०२६ या कालावधीत सहयोगनगर, गोकुळनगर पठार येथील ‘गुरुकृपा क्लिनिक’मध्ये हा प्रकार सुरू होता. आरोपीकडे वैद्यकीय व्यवसायासाठी आवश्यक मान्यताप्राप्त पदवी नसल्याचे तसेच कोणत्याही वैद्यकीय परिषदेकडे नोंदणी झालेली नसल्याचे फिर्यादीत म्हटले आहे.
वारजे माळवाडी पोलिस अधिक तपास करत आहेत. दुसऱ्या गुन्ह्यात वैध वैद्यकीय नोंदणी नसताना नावापुढे ‘डॉक्टर’ पदवी लावून वैद्यकीय व्यवसाय केल्याचा प्रकार खराडीत उघडकीस आला. हॉस्पिटलमध्ये बनावट मेडिकल नोंदणी प्रमाणपत्र लावल्याचाही आरोप आहे. याप्रकरणी धीरज दिलीप येवले (वय २९, रा. चाळीसगाव, जि. जळगाव) याच्यावर चंदननगर पोलिस ठाण्यात गुन्हा दाखल केला आहे.
याबाबत गोपाळ किशनराव उजवणकर (वय ४०, रा. अंबानगरी सोसायटी, धानोरी रस्ता, विश्रांतवाडी) यांनी फिर्याद दिली आहे. जुलै २०२५ ते जुलै २०२६ या कालावधीत जुना मुंढवा रस्त्यावरील प्लॅटिनियम टॉवरमधील श्री विघ्नहर्ता पॉलिक्लिनिक आणि विश्रांतवाडीतील हॉस्पिटलमध्ये हा प्रकार घडला. आरोपीने वैध नोंदणी नसताना डॉक्टर असल्याचे भासवून रुग्णांवर उपचार केले. शासनाची फसवणूक केल्याप्रकरणी पोलिस तपास करत आहेत.
