पुणे: उन्हाळ्याच्या तीवतेत सदनिकेचा पाणीपुरवठा बंद केल्याप्रकरणी अतिरिक्त पुणे जिल्हा ग््रााहक तक्रार निवारण आयोगाने गणराज डेव्हलपर्ससह त्याच्या संचालकांना चांगलाच झटका दिला आहे. तक्रारदाराच्या सदनिकेचा पाणीपुरवठा तत्काळ सुरू करण्याचे आदेश देत पुढील सुनावणीपर्यंत तो बंद न करण्याचे निर्देश आयोगाने दिले आहेत. आयोगाचे अध्यक्ष अरुण गायकवाड, सदस्य प्रणाली सावंत आणि सदस्य कांचन गंगाधरे यांनी हा निकाल दिला.
याबाबत राजाभाऊ क्षीरसागर यांनी तक्रार आयोगात तक्रार दिली होती. संबंधित बांधकाम व्यावसायिकाने यापूर्वी 15 जानेवारी 2023 रोजी पाणीपुरवठा खंडित केला होता. त्या वेळी ग््रााहक तक्रारीची नोटीस मिळाल्यानंतर तो पुन्हा सुरू करण्यात आला होता. मात्र, त्यानंतर बाहेरगावी असताना 27 मार्च 2026 रोजी पुन्हा पाणीपुरवठा बंद करण्यात आल्याने त्याने ॲड. ज्ञानराज संत यांच्यामार्फत आयोगाकडे धाव घेतली.
बांधकाम व्यावसायिकाकडून नोटीस स्वीकारण्यास टाळाटाळ केली जात आहे. तसेच, पाणीपुरवठा बंद करण्यापूर्वी कोणतीही पूर्वसूचना देण्यात आली नव्हती. सदनिकाधारक तक्रारदाराला मोठ्या अडचणींना सामोरे जावे लागत असल्याचा युक्तिवाद ॲड. संत यांनी केला.
पाणी जीवनावश्यक गरज: आयोग
पाणी ही जीवनावश्यक गरज आहे. पाणीपुरवठ्याबाबतचे प्रकरण न्यायप्रविष्ट असताना तो बंद करणे हे प्रथमदर्शनी मनमानी व बेकायदेशीर आहे. तसेच, बांधकाम व्यावसायिकाने योग्य कारण असल्यास आयोगाची परवानगी घेणे आवश्यक होते.
या पार्श्वभूमीवर आयोगाने बांधकाम व्यावसायिकाला तत्काळ पाणीपुरवठा सुरू करण्याचे आणि अंतिम निर्णय होईपर्यंत तो बंद न करण्याचे स्पष्ट आदेश दिले आहेत. तसेच, बांधकाम व्यावसायिक दत्तात्रय बेलदरे यांना नोटीस बजावून पुढील सुनावणीस उपस्थित राहण्याचे निर्देशही देण्यात आले आहेत.
