पुणे: शहरातील अधिकृत जाहिरात फलकांवर क्यूआर कोड लावणे आता अनिवार्य करण्यात आले आहे. महापालिकेच्या परवाना व आकाशचिन्ह विभागाने हा निर्णय घेतला असून, 27 मेपासून त्याची अंमलबजावणी सुरू होणार आहे. महाराष्ट्र शासनाच्या 9 मे 2022 च्या जाहिरात नियंत्रण नियमावलीनुसार ही कारवाई केली जाणार असल्याची माहिती महापालिकेकडून देण्यात आली आहे.
या निर्णयामुळे जाहिरात फलकांबाबत अधिक पारदर्शकता येणार असल्याचा दावा प्रशासनाने केला आहे. नागरिकांना संबंधित फलकाची परवानगी, नूतनीकरण, मालकी हक्क, तसेच परवान्याची वैधता यासंबंधीची माहिती क्यूआर कोड स्कॅन करून मोबाईलवर सहज पाहता येणार आहे.
महापालिकेच्या माहिती व तंत्रज्ञान विभागामार्फत हे क्यूआर कोड उपलब्ध करून दिले जाणार आहेत. प्रत्येक जाहिरात फलकाच्या खालच्या उजव्या कोपऱ्यात ते स्पष्टपणे लावणे बंधनकारक असेल. ज्या फलकांवर क्यूआर कोड नसतील, किंवा स्कॅन केल्यानंतर आवश्यक माहिती उपलब्ध होणार नाही, तसेच माहितीफलक नसलेल्या जाहिरातींना अनधिकृत समजून त्यांच्यावर कारवाई करण्यात येणार आहे.
क्यूआर कोडमधील माहितीमध्ये बदल करण्यासाठी महापालिकेची पूर्वपरवानगी आवश्यक राहणार असून, त्यावर माहिती व तंत्रज्ञान विभागाचे नियंत्रण असेल. नियमांची अंमलबजावणी काटेकोरपणे करण्याचे निर्देश देण्यात आले आहेत. संबंधित क्षेत्रीय कार्यालयांतील सहायक आयुक्तांना कारवाईचे अधिकार देण्यात आले असून, कोणतीही कसूर झाल्यास संबंधित अधिकाऱ्यांवरही जबाबदारी निश्चित केली जाणार आहे.
या संदर्भात अतिरिक्त महापालिका आयुक्त प्रजित नायर यांनी आदेश जारी केले असून, शहरातील अनधिकृत जाहिरातींवर नियंत्रण ठेवण्यासाठी हा निर्णय महत्त्वपूर्ण ठरणार आहे. यामुळे अधिकृत होर्डिंग्सची स्पष्ट ओळखही नागरिकांना होणार आहे.
