पुणे: वनाझ ते रामवाडी या मेट्रो मार्गिकेवरील डेक्कन जिमखाना मेट्रो स्थानकाला पेठ भागाशी जोडणाऱ्या पादचारी पुलाचे काम सुरू असल्याने मंगळवारी दि. ९ जूनच्या रात्री १२ वाजेपासून ते ५ सप्टेंबरपर्यंत मुठा नदीवरील भिडे पूल नागरिकांच्या सुरक्षिततेसाठी वाहतुकीस पूर्णपणे बंद ठेवण्यात येणार आहे.
पुणे मेट्रोने दिलेल्या माहितीनुसार, पोलिसांच्या वाहतूक शाखेकडून या कामासाठी ना-हरकत प्रमाणपत्र मिळाले आहे. दरम्यान, भिडे पूल बंद असला, तरी नदीपात्रातील रस्ता वाहतुकीसाठी पूर्णपणे खुला असेल.
वनाझ ते रामवाडी मार्गावरील छत्रपती संभाजी उद्यान व डेक्कन जिमखाना या स्थानकांना पुण्याच्या मध्यवर्ती पेठ भागाशी जोडण्यासाठी पादचारी पूल बांधण्यात येत आहेत. यातील छत्रपती संभाजी उद्यान स्थानकाचा पूल आधीच नागरिकांसाठी खुला झाला आहे.
आता डेक्कन स्थानकाचा पूल थेट भिडे पुलावरून बांधण्यात येत आहे. हा पूल पूर्ण झाल्यावर नारायण पेठ, शनिवार पेठ, लक्ष्मी रस्ता परिसरातील नागरिक आणि विद्यार्थ्यांना डेक्कन मेट्रो स्थानकात ये-जा करणे अतिशय सोपे होणार आहे.
वाहतुकीसाठी हे आहेत पर्यायी मार्ग...
भिडे पूल बंद असलेल्या काळात नागरिकांनी खालील पुलांचा वापर करून प्रवास करावा...
लकडी पूल (संभाजी पूल)
बालगंधर्व पूल
झेड ब्रिज
