पुणे: महापालिकेत समाविष्ट 23 गावांचा प्रारूप विकास आराखडा (डीपी) तयार करण्यासंबंधीची प्रक्रिया सुरू केली. या आराखड्याचा इरादा जाहीर करणे आणि त्यासाठी नगर नियोजन अधिकार्याची नेमणूक करणे यासाठीच्या मंजुरीचा प्रस्ताव प्रशासनाने शहर सुधारणा समितीपुढे मंजुरीसाठी ठेवला आहे.
शहर सुधारणासह मुख्य सभेच्या मंजुरीनंतर त्यावर कार्यवाही सुरू होणार आहे. हद्दीलगतच्या 23 गावे जुन 2021 मध्ये महापालिकेत समाविष्ट करण्याचा निर्णय राज्य शासनाने घेतला.
मात्र, ही गावे पुणे महानगर विकास प्राधिकरणाच्या हद्दीत असतानाच त्यांचा प्रारूप आराखडा तयार करण्याची कार्यवाही सुरू झाली होती. त्यामुळे या गावांचा आराखडा पीएमआरडीएकडून तयारही करण्यात आला होता. मात्र, त्याबाबत प्रचंड तक्रारी आल्याने शासनाने हा आराखडाच रद्द केला होता.
त्यामुळे आता शासनाच्या निर्देशानुसार महापालिका हा आराखडा तयार करणार आहे. त्यासाठी नगर नियोजन अधिकारी म्हणून शहर अभियंता अनिरुद्ध पावसकर यांच्या नेमणुकीचा प्रस्ताव शहर सुधारणा समितीकडे मंजुरीसाठी पाठविला आहे.
आराखड्यासाठी कमी कालावधी लागणार
महापालिकेला प्रारूप विकास आराखडा तयार करण्यासाठी 2 वर्षांची मुदत असणार आहे. मात्र, 23 गावांचा आराखडा करण्याची प्रक्रिया यापूर्वी पीएमआरडीएच्या माध्यमातून झाली आहे. त्यामुळे त्याचा उपयोग आता नव्याने आराखडा तयार करताना होणार असल्याने हा अवधी कमी होऊन कमी कालावधीच आराखडा तयार होईल, असे सांगण्यात येत आहे.
