लोणावळा : पुढारी वृत्तसेवा : लोणावळा शहरातील जुन्या पुणे-मुंबई महामार्गालगतच्या व सहारा पुलावरील अनधिकृत टपर्या, खाद्य पदार्थाची विक्री करणारे टेम्पो, स्टॉल व दुकानधारकांवर लवकरच कारवाई करीत ही ठिकाणे बंद करण्यात येणार असल्याची माहिती लोणावळा उपविभागीय पोलिस अधिकारी आयपीएस सत्यसाई कार्तिक यांनी दिली आहे. यासंदर्भात त्यांनी पोलिस दलाकडून रस्ते विकास महामंडळ अर्थात एमएसआरडीसी आणि लोणावळा नगर परिषदेला सूचना देणारे पत्र देण्यात आल्याचेही सत्यसाई कार्तिक यांनी सांगितले. लोणावळा शहर हे पर्यटनस्थळ असल्याने दर शनिवारी व रविवारी तसेच सुटीच्या दिवशी मोठ्या प्रमाणात पर्यटक तसेच व्हीआयपी व्यक्ती देशभरातून तसेच विदेशातून पर्यटक येथे येत असतात. त्यामुळे वाहतुकीची कोंडी होऊन वाहतूक नियमन करावे लागते. या वाहतूक कोंडीचा पर्यटकांना तसेच सर्वसामान्य जनतेला नाहक त्रास सहन करावा लागतो.
राष्ट्रीय महामार्ग क. 48 मुंबई ते पुणे या महामार्गालगतच्या लोणावळ्यातील मॅगी पॉईंट येथे थांबणार्या वाहनांमुळे त्या वाहतूक कोंडीत वाढ होत असते. सोबतच याठिकाणी बेकायदा रात्रभर सुरू राहणार्या अनधिकृत स्नॅक्स सेंटर व टपर्यांवर छोट्यामोठ्या गुन्ह्याच्या घटना अनेकदा घडल्या आहेत. याशिवाय या अनधिकृत व्यवसाय करणार्यांमध्ये वर्चस्वाची स्पर्धा निर्माण होऊन त्याचे आपापसांत हाणामारीमध्ये रुपांतर झालेले असून त्यावरुन लोणावळा शहर पोलिस स्टेशनमध्ये गंभीर स्वरुपाचे गुन्हे दाखल झाले असल्याचे आईपीएस सत्यसाई कार्तिक यांनी पत्रकारांशी बोलताना सांगितले.
हेही वाचा
