पाटस : पाटस (ता. दौंड) परिसरातील दौंड - पाटस अष्टविनायक महामार्गावर शुक्रवारी (दि. २७) सकाळी पावणे अकराच्या सुमारास चारचाकी वाहनाला अचानक आग लागून वाहन पूर्णपणे जळून खाक झाल्याची घटना घडली. या घटनेमुळे काही काळ परिसरात भीतीचे वातावरण निर्माण झाले होते.
स्थानिक नागरिकांच्या मिळालेल्या माहितीनुसार, चालक पाटसवरून दौंडकडे जात होता. गार फाटा परिसरात चारचाकी वाहनातून अचानक धूर निघू लागला. चालकाने तत्काळ वाहन रस्त्याच्या कडेला थांबवले. काही क्षणातच इंजिन भागातून मोठ्या प्रमाणात आगीच्या ज्वाळा उसळल्या आणि वाहनाने भयंकर पेट घेतला.
आग लागल्याची माहिती मिळताच स्थानिक नागरिकांनी व तरुणांनी तत्काळ घटनास्थळी धाव घेतली. काहींनी पाण्याच्या बादल्या आणून आग नियंत्रणात आणण्याचा प्रयत्न केला, तर काहींनी वाहतूक बाजूला वळवून पुढील अपघात टाळण्याचे काम केले; मात्र आग प्रचंड असल्याने काही मिनिटांतच संपूर्ण वाहन ज्वाळांच्या भक्ष्यस्थानी पडले.
या घटनेदरम्यान दौंड-पाटस मार्गावर सुमारे अर्धा तास वाहतूक ठप्प झाली. दोन्ही बाजूंना वाहनांच्या रांगा लागल्याने नागरिकांना मोठ्या प्रमाणात वाहतूक कोंडीचा सामना करावा लागला. सकाळी कामावर जाण्याची वेळ असल्याने प्रवाशांची व भाविकांची मोठी गैरसोय झाली.
या आगीच्या घटनास्थळी पोलिस प्रशासन उशिरा पोहोचल्याची चर्चा परिसरात रंगली. त्यामुळे काही नागरिकांनी नाराजी व्यक्त करत आपत्कालीन परिस्थितीत तत्काळ प्रतिसाद मिळणे आवश्यक असल्याची मागणी केली.
दरम्यान, उन्हाळ्याची तीव्रता वाढू लागल्याने वाहनांमध्ये वायरिंग बिघाड, इंजिन ओव्हरहिटिंग किंवा इंधन गळतीमुळे आग लागण्याच्या घटना घडत असल्याचे वाहनतज्ज्ञ सांगतात. त्यामुळे वाहनधारकांनी नियमित सर्व्हिसिंग, वायरिंग तपासणी आणि अग्निशामक यंत्र ठेवण्याबाबत जागरूक राहण्याचे आवाहन करण्यात येत आहे. सुदैवाने या घटनेत कोणतीही जीवितहानी झाली नसून चालक सुरक्षित बचावला असल्याची माहिती मिळाली आहे.
