पुणे: अकरावी ऑनलाइन प्रवेश प्रक्रियेची पहिली गुणवत्ता यादी जाहीर झाली असून, पहिल्या प्रवेश फेरीअंतर्गत पुणे विभागातील 1 लाख 16 हजार 291 जागांसाठी प्रवेश जाहीर करण्यात आला आहे. प्रवेश जाहीर झालेल्या विद्यार्थ्यांना 30 जून ते 7 जुलैपर्यंत मुदत देण्यात आली आहे. त्यानुसार दोनच दिवसांमध्ये तब्बल 1 लाख 58 हजार 146 विद्यार्थ्यांनी कॅपद्वारे प्रवेश घेतल्याचे स्पष्ट झाले आहे.
अकरावी प्रवेशाची गुणवत्ता यादी शनिवारी सायंकाळी 5 वाजता जाहीर करण्यात आली. शिक्षण विभागाने प्रसिद्ध केलेल्या वेळापत्रकानुसार, विद्यार्थ्यांना 30 जून ते 7 जुलै या कालावधीत प्रत्यक्ष महाविद्यालयात जाऊन प्रवेश घेण्याची संधी देण्यात आली आहे. अकरावी ऑनलाइन प्रवेशातील पहिल्या प्रवेश फेरीसाठी राज्यातील 10 लाख 66 हजार 5 विद्यार्थ्यांनी अर्ज केले.
त्यात कला शाखेच्या 2 लाख 31 हजार 356 विद्यार्थ्यांनी, तर वाणिज्य शाखेच्या 2 लाख 24 हजार 931 विद्यार्थ्यांनी आणि विज्ञान शाखेच्या 6 लाख 9 हजार 718 विद्यार्थ्यांनी प्रवेशासाठी अर्ज केले आहेत. अर्ज केलेल्या 10 लाख 66 हजार 5 विद्यार्थ्यांपैकी 6 लाख 32 हजार 194 विद्यार्थ्यांना त्यांनी दिलेल्या पसंती क्रमांकानुसार पहिल्या फेरीसाठी विद्यार्थ्यांना प्रवेश जाहीर करण्यात आला आहे.
अकरावी प्रवेशासाठी राज्यात 9 हजार 435 महाविद्यालयांमध्ये 16 लाख 60 हजार 84 जागा कॅप प्रवेशाच्या तसेच 4 लाख 63 हजार 636 जागा कोटा अशा एकूण 21 लाख 23 हजार 720 जागा उपलब्ध आहेत.
7 जुलैपर्यंत भरा अर्जाचा भाग 1
अकरावी प्रवेशासाठी नवीन विद्यार्थी नोंदणी व अर्जचा भाग-1 भरणे. नियमित फेरी 1 मध्ये नोंदणी अपूर्ण असलेल्या विद्यार्थ्यांसाठी अर्जाचा भाग-1 भरण्याची सुविधा संकेतस्थळावर दिनांक 02 जुलैपासून सकाळी 10 ते 7 जुलै सायंकाळी 5 वाजेपर्यंत कालावधी देण्यात येत आहे. नियमित फेरी-2 मधील अर्जाचा भाग-2 पसंतीक्रम देण्याची सुविधा दिनांक 10 ते 13 जुलै, 2025 पर्यंत कालावधी देण्यात येणार आहे. ज्या कनिष्ठ महाविद्यालयांना नोंदणी करायची आहे. त्यांच्यासाठी संबंधित विभागीय शिक्षण उपसंचालक स्तरावर 2 जुलैपासून सकाळी 10 ते 7 जुलै सायंकाळी 5 वाजेपर्यंत कालावधी देण्यात आला असल्याचे स्पष्ट करण्यात आले आहे.
