खोर (ता.दौंड); पुढारी वृत्तसेवा : वरवंड येथे तृतीयपंथीयाचा धारदार हत्याराने गळा चिरून निर्घृणपणे खून केल्याची घटना उघडकीस आली. या घटनेनंतर अवघ्या काही तासांतच यवत पोलिसांनी एका संशयिताला ताब्यात घेतले आहे. सचिन ऊर्फ सोनुदीदी दिनेश जाधव (वय 40, मूळ रा. वडापूर, ता. दक्षिण सोलापूर, सध्या रा. वरवंड, ता. दौंड) असे खून झालेल्या तृतीयपंथीयाचे नाव आहे.
चंद्रकांत ऊर्फ चंदर शिवाजी जाधव (वय 30, रा. वरवंड) या संशयितास पोलिसांनी ताब्यात घेतले आहे. दि. 6 जून रोजी रात्री 9 च्या आसपास ही घटना घडली. याबाबत पोलिसांनी दिलेली माहिती अशी की, वरवंड येथील बापू खोमणे यांच्या एका खोलीत भाड्याने सचिन ऊर्फ दीदी जाधव या राहत होती. गुरुवारी (दि. 8) या खोलीतून दुर्गंधी आल्याने संशय बळावला आणि यवत पोलिसांना बोलावण्यात आले.
घटनेची माहिती मिळतात यवतचे पोलिस निरीक्षक हेमंत शेडगे, दौंडचे प्रभारी उपविभागीय पोलिस अधिकारी रेखा वाणी, सहायक पोलिस निरीक्षक केशव वाबळे, पोलिस उपनिरीक्षक विजय कोल्हे, संजय नागरगोजे यांनी घटनास्थळी धाव घेत पाहणी केली. या वेळी तीक्ष्ण हत्याराने गळा चिरून हत्या केल्याचे प्रथमदर्शनी निदर्शनास आले. दोन दिवसांपूर्वी ही हत्या केल्याचे पोलिस तपासात निष्पन्न झाले आहे.
यवत पोलिस निरीक्षक हेमंत शेडगे यांनी तत्काळ संबंधित घटनेचा तपासण्यासाठी पोलिस पथके तैनात केली. पोलिस हवालदार नीलेश कदम, गुरू गायकवाड, अक्षय यादव, संभाजी कदम आदींच्या पथकाने अवघ्या काही तासांतच संशयिताला अटक करण्याची कामगिरी केली. या प्रकरणी बापू मारुती खोमणे यांनी यवत पोलिस ठाण्यात फिर्याद दिल्याने खुनाचा गुन्हा दाखल करण्यात आला, अशी माहिती पोलिस निरीक्षक हेमंत शेडगे यांनी दिली.
हेही वाचा
