Pune Parvati Child Abuse Case
पुणे : पुणे जिल्ह्यातील नसरापूर येथे साडेतीन वर्षांच्या चिमुरडीवरील अत्याचार आणि हत्येची घटना ताजी असतानाच आता पुणे शहरातही लहान मुलीवर अत्याचाराचा प्रयत्न केल्याची घटना घडली आहे. पर्वती येथे 50 वर्षांच्या व्यक्तीने हे कृत्य केले असून या घटनेनं स्थानिकांमध्ये संतापाची लाट पसरली आहे.
मंगळवारी रात्री पर्वती येथील जनता वसाहत भागात 50 वर्षांच्या व्यक्तीने लहान मुलीचे कपडे काढून तिच्यावर अत्याचाराचा प्रयत्न केला. हा प्रकार नागरिकांनी पाहिल्याने अनर्थ टळला. नागरिकांमुळे पीडितेची त्या नराधमाच्या तावडीतून सुटका झाली. या घटनेची माहिती समजताच पोलिसांनी आरोपीला ताब्यात घेतले.
दरम्यान, या घटनेनंतर पर्वती पोलीस ठाण्यासमोर स्थानिकांनी गर्दी केली. लहान मुलीवर अत्याचाराचा प्रयत्न करणाऱ्या 'आरोपीला आमच्या ताब्यात द्या', अशी मागणी स्थानिक करत होते. रात्री उशिरापर्यंत पोलिसांकडून पोलीस ठाण्यासमोरील गर्दी हटवण्याचे प्रयत्न सुरू होते. नागरिकांनी घरी जाण्याचे आवाहन पोलिसांनी केले असून आरोपीला पोलिसांनी ताब्यात घेतले आहे. त्याची चौकशी सुरु असल्याचे पोलिसांनी सांगितले. आरोपी हा पीडित मुलीचा नातेवाईक असल्याचे वृत्त आहे.
पीडित मुलीला वैद्यकीय तपासणीसाठी ससून रुग्णालयात पाठवण्यात आले आहे. आरोपीविरोधात गुन्हा दाखल करण्याची प्रक्रिया सुरू असून हा खटला फास्टट्रॅक कोर्टात चालवणार असल्याची माहिती पोलिसांनी दिली.
