पुणे: महाराष्ट्रातील दूध भेसळयुक्त असल्याच्या चर्चेला मला पूर्णविराम द्यायचा असून, दूध उत्पादक शेतकऱ्यांच्या गायी-म्हशीच्या दुधाला वाजवी दर आणि ग्राहकांना निर्भेळ व उत्तम गुणप्रतीचे चांगले दूध मिळायला हवे. त्यादृष्टीने अन्नपदार्थांमधील भेसळीचे उच्चाटन करण्यासाठी मी तपासण्यांची मोहीम हाती घेतली आहे.
तपासण्या करण्यात, धाडी टाकण्यात अथवा कोणावरही कारवाई करण्यात आम्हाला रस नाही. परंतु, चुकीचे वागणाऱ्यांची गय केली जाणार नाही आणि ज्यामध्ये भेसळखोरांना पूर्णपणे अटकाव केल्याशिवाय तपासण्यांची मोहीम थांबणार नसल्याचा इशारा अन्न व औषध प्रशासनाचे आयुक्त तुकाराम मुंढे यांनी दिला आहे.
दूध उत्पादक व प्रक्रिया व्यावसायिक कल्याणकारी संघाच्या शिष्टमंडळाने मुंबईतील अन्न व औषध प्रशासनाच्या वांद्रा-कुर्ला कॉम्प्लेक्स येथील कार्यालयात मुंढे यांची भेट घेतली. या वेळी असोसिएशनचे ज्येष्ठ संचालक श्रीपाद चितळे, आबासाहेब थोरात आणि कल्याणकारी संघाचे मानद सचिव प्रकाश कुतवळ यांनी पुष्पगुच्छ देऊन त्यांचा सत्कार केला. त्यानंतर झालेल्या चर्चेत त्यांनी अन्न व औषध प्रशासन विभागाच्या आगामी काळात राबवायच्या विविध विषयांवर सखोल चर्चा केली.
दूध भेसळ आणि भेसळीच्या पनीरला अटकाव घालण्यासाठी कल्याणकारी संघाने शासनाच्या दुग्धव्यवसाय विकास विभाग आणि अन्न व औषध विभागास बरोबर घेऊन बनावट पनीरविरोधात ग्राहक जागरूकता मोहीम सुरू केल्याची माहिती शिष्टमंडळाने दिली. या संयुक्त मोहिमेची फलश्रुती म्हणून आता दुधापासून बनवलेल्या पनीरला ग्राहकांकडून मागणी वाढलेली आहे. शिवाय हॉटेलमध्ये आमच्याकडे ओरिजनल पनीरपासून बनवलेल्या भाज्या उपलब्ध असल्याचे फलक दिसायला सुरुवात झाली असून, शेवटी यातूनच शेतकऱ्यांच्या दुधाला अधिक रक्कम देणे दूध संस्थांना शक्य होणार असल्याचे सांगण्यात आले.
ग्रामीण भागात दुग्धव्यवसाय हा शेतकऱ्यांना प्रमुख अर्थार्जनाचे साधन आहे. पुढील काळामध्ये राज्यातील दूध व्यवसायातील दूध पावडर प्रकल्प आणि पाऊच पॅकिंग करणाऱ्या सर्व दूध संस्थांबरोबर आपण संयुक्त बैठक घेऊ, ही कल्याणकारी संघाची मागणीही मुंढे यांनी मान्य केली आहे. जून महिनाअखेर ही बैठक घेण्याचे नियोजन आहे. त्याचवेळी अन्न व औषध विभागाच्या लॅबोरेटरीज अद्ययावत हव्यात, यावरही त्यांनी सहमती दर्शविली आहे.
प्रकाश कुतवळ, सचिव, दूध उत्पादक व प्रक्रिया व्यावसायिक कल्याणकारी संघ, पुणे
