फुरसुंगी : पुढारी वृत्तसेवा : 'वडकी येथील ऐतिहासिक मस्तानी तलावाच्या संवर्धनासाठी 25 लाख रुपयांचा निधी मंजूर करण्यात आला आहे. परंतु, तलावाच्या मालकीची कोणत्याही शासकीय विभागाकडे नोंद नव्हती. त्यामुळे विकासाला तांत्रिक अडचणी येत होत्या. मात्र, तलावाचा सातबारा भूमिअभिलेख विभागाकडून लवकरच मिळणार असून, या परिसराचा सर्वांगीण विकास करता येईल,' असे आमदार संजय जगताप यांनी सांगितले. वडकी गावात विविध विकासकामांचे भूमिपूजन नुकतेच करण्यात आले, त्या वेळी ते बोलत होते.
वडकीचे सरपंच अरुण गायकवाड, बाळासाहेब साबळे, पंडित मोडक, ग्रामपंचायत सदस्य व नागरिक उपस्थित होते. वडकी येथील भैरवनाथ मंदिरासमोरील विकासकामांचेही भूमिपूजन या वेळी करण्यात आले. यामध्ये महादेव मंदिर येथील ओढ्यावर साकव बांधणे, भूमिगत गटारे, अंतर्गत रस्ते, सामाजिक सभागृह, काळभैरवनाथ मंदिरासमोर व्यासपीठ व खुले रंगमंच, सभागृह, मुस्लिम दफनभूमीस सुरक्षा भिंत आदी कामांचा यात समावेश आहे. खासदार सुप्रिया सुळे व जगताप यांच्या प्रयत्नातून या विकासकामांसाठी निधी उपलब्ध झाला आहे. वडकीतील अन्य कामांसाठीही निधी उपलब्ध होणार असल्याचे या प्रसंगी जगताप यांनी सांगितले.
