पुणे: राज्यात ९ जुलै रोजी झालेल्या शाळा बंद आंदोलनात सहभागी झालेल्या ८ हजार ६१९ शिक्षकांच्या एका दिवसाच्या वेतनात कपात करण्यात येणार असल्याची माहिती माध्यमिक व उच्च माध्यमिक शिक्षण संचालक डॉ. महेश पालकर यांनी दिली. विद्यार्थ्यांचे शैक्षणिक नुकसान होऊ नये, या भूमिकेतून शासनाने आंदोलनात सहभागी होणाऱ्या शिक्षक व कर्मचाऱ्यांवर कारवाईचे आदेश यापूर्वीच दिले होते.
९ जुलैच्या आंदोलनापूर्वीच माध्यमिक व उच्च माध्यमिक शिक्षण संचालकांनी सर्व विभागीय उपसंचालक व शिक्षणाधिकाऱ्यांना कोणतीही शाळा बंद राहू नये, असे स्पष्ट निर्देश दिले होते. तसेच, शाळा बंद ठेवणारे मुख्याध्यापक, शिक्षक आणि शिक्षकेतर कर्मचाऱ्यांच्या एका दिवसाच्या वेतनात कपात करण्याचे आदेशही जारी करण्यात आले होते.
शासनाच्या इशाऱ्यानंतरही राज्यातील अनेक शिक्षक आंदोलनात सहभागी झाले. विविध मागण्यांसाठी मुंबईत आंदोलन करण्यात आले. परंतु, या आंदोलनामुळे विद्यार्थ्यांचे नुकसान झाले. त्यामुळे आंदोलनात सहभागी झालेल्या शिक्षकांवर वेतन कपातीची कारवाई करण्यात येणार असल्याचे डॉ. पालकर यांनी स्पष्ट केले.
