ओतूर: आज मंगळवारी दुपारी चार वाजण्याचा सुमारास शेतकरी आपल्या शेतात काम करण्यात मग्न असताना बाजूच्याच शेतात अगोदरच दबा धरून बसलेल्या बिबट्याने शेतकऱ्यावर वेगात झेप घेऊन जबर हल्ला करण्याचा प्रयत्न केला. शेतकऱ्याने वेळीच सावध पवित्रा घेत मोठमोठ्याने आरडाओरड केल्याने आजूबाजूचे शेतकरी तात्काळ घटनास्थळी हजर होत गलका केल्यामुळे शेतात थांबून राहिलेल्या बिबट्याने पुन्हा उसाच्या शेतात धूम ठोकली मात्र शेतकऱ्याच्या पायाला बिबट्याने ओरबाडल्यामुळे जखम झाली.
ओतूर (ता. जुन्नर) येथील रहाटीमळा येथे आज मंगळवारी ही घटना घडली असून विनोद बबन चौरे (वय 48 रा. ओतूर,(रहाटी मळा) असे बिबट्या हल्ल्यात जखमी झालेल्या शेतकऱ्याचे नाव आहे.
याबाबतची माहिती स्थानिक नागरिकांनी ओतूर वनविभागाला कळविली असता वनपाल विश्वनाथ बेले, सारिका बुट्टे यांनी आपल्या टीमसह घटनास्थळी तात्काळ धाव घेत जखमी विनोद यास ओतूर येथील प्राथमिक आरोग्य केंद्रात प्रथमोपचार करून पुढील उपचारासाठी नारायणगाव येथील ग्रामीण रुग्णालयात दाखल केले आहे.
दरम्यान शेतावर तसेच वाड्यावस्त्यांवर रहाणाऱ्या नागरिकांनी दिवसा व रात्रीच्या सुमारास विशेष काळजी घेण्याचे आवाहन वनविभागाच्या वतीने करण्यात येत आहे.
फोटो: शेतकऱ्याच्या पायाला झालेली जखम.
