वेल्हे: मोसे-मुठा खोर्यासह रायगड जिल्ह्याच्या हद्दीवरील धरणक्षेत्रात मंगळवारी (दि. 24) सकाळपासून मुसळधार पाऊस पडत आहे. त्यामुळे गेल्या 24 तासांत खडकवासला धरणसाखळीत जवळपास सव्वा म्हणजे 1.18 टीएमसीची वाढ झाली.
तर खडकवासला धरणातून मुठा नदीच्या विसर्गात 7 हजार 700 क्सुसेक इतकी वाढ करण्यात आली. खडकवासला धरणसाखळीची एकूण पाणी साठवणक्षमता 29.15 टीएमसी असून दिवसअखेर धरणसाखळीत 11.93 टीएमसी 40.94 टक्के पाणीसाठा झाला होता. (Latest Pune News)
35 तासांत टेमघरला 146 मिलिमीटर पाऊस सोमवारी (दि. 23) सकाळी 6 ते मंगळवार सायंकाळी 5 वाजेपर्यंतच्या 35 तासांत सर्वात अधिक 146 मिलिमीटर पाऊस टेमघर येथे पडला, तर याच कालावधीत वरसगाव येथे 122, पानशेत 121 व खडकवासला येथे 21 मिलिमीटर इतक्या पावसाची नोंद झाली.
सोमवारी सायंकाळी 5 वाजता धरणसाखळीत 10.74 टीएमसी पाणी होते. मंगळवारी दिवसभरात पानशेत येथे 53, वरसगाव येथे 52, टेमघर येथे 34 व खडकवासला येथे 12 मिलिमीटर पाऊस पडला. सोमवारपेक्षा मंगळवारी रायगड जिल्ह्याच्या हद्दीवरील धरणक्षेत्रासह मोसे-मुठा खोर्यात पावसाचा जोर वाढला आहे, त्यामळे ओढे-नाले, नद्या दुथडी भरून वाहत आहेत.
सर्व चारही धरणांतील पाण्याची आवक वाढली आहे. खडकवासला, सिंहगड भागात मात्र पावसाचे प्रमाण कमी आहे. मंगळवारी पहाटेपासून दुपारी 2 वाजेपर्यंत डोंगरी पट्ट्यात मुसळधार पाऊस पडत होता. सायंकाळी 5 वाजल्यानंतर पावसाचा जोर कमी झाला.
पानशेत धरण विभागाचे शाखा अभियंता अनुराग मारके म्हणाले, धरणक्षेत्रात मंगळवारी चांगला पाऊस पडल्याने पाण्याची आवक वाढली. त्यामुळे धरणाच्या पाणीसाठ्यात अधिक वाढ झाली आहे. खडकवासला धरणाची पाणीपातळी 66 टक्क्यांहून अधिक झाली. त्यामुळे मुठा नदीच्या विसर्गात टप्प्याटप्प्याने वाढ करण्यात येत आहे. सध्या नदीत 7 हजार 700 व मुठा कालव्यात 352 क्सुसेकने पाणी सोडले जात आहे.
