पुणे: कात्रज-कोंढवा रस्त्याच्या रुंदीकरणासाठी पहिल्या टप्प्यातील भूसंपादन प्रक्रिया अंतिम टप्प्यात आली असली, तरी कान्हा हॉटेल चौक ते खडीमशिन चौक दरम्यान आवश्यक जागा अद्याप ताब्यात आली नाही. त्यामुळे संपूर्ण प्रकल्पाचे काम अपूर्ण राहण्याची शक्यता निर्माण झाली आहे.
महापालिकेने पहिल्या टप्प्यातील 50 मीटर रुंदीकरणासाठी आवश्यक असलेल्या 109 मिळकतींपैकी 100 मिळकती ताब्यात घेतल्या असून, उर्वरित नऊ मिळकतीही लवकरच ताब्यात येतील, असा दावा प्रशासनाने केला आहे. नोव्हेंबरपर्यंत हा टप्पा पूर्ण होईल, असा विश्वासही व्यक्त करण्यात आला आहे.
कात्रज ते कोंढवा (खडीमशिन चौक) हा साडेतीन किलोमीटरचा मार्ग शहरातील सर्वाधिक वर्दळीच्या रस्त्यांपैकी एक मानला जातो. वाढती लोकसंख्या व वाहनांची संख्या, मोठ्या प्रमाणावर झालेल्या बांधकामांमुळे या मार्गावर दररोज तीव वाहतूक कोंडी होत आहे. ही समस्या सोडविण्यासाठी महापालिकेने 2017 मध्ये हा मार्ग 84 मीटर रुंद करण्याचा महत्त्वाकांक्षी प्रकल्प हाती घेतला होता. मात्र, मोठ्या प्रमाणावरील भूसंपादन, जागा उपलब्धतेचा अभाव आणि स्थानिक अडचणींमुळे प्रकल्प अनेक वर्षे रखडला.
यानंतर प्रशासनाने टप्प्याटप्प्याने काम करण्याचा निर्णय घेत पहिल्या टप्प्यात 50 मीटर रुंदीकरणाला प्राधान्य दिले. छोट्या मिळकतधारकांना टीडीआर व एफएसआय देताना अडचणी निर्माण होत असल्याने अनेकांनी रोख मोबदल्याची मागणी केली. त्यानुसार महापालिकेने थेट आर्थिक मोबदल्याद्वारे भूसंपादनाचा मार्ग स्वीकारला. महापालिका आयुक्त नवल किशोर राम यांनी या प्रकल्पावर विशेष लक्ष केंद्रित करीत संबंधित प्रस्ताव जिल्हाधिकाऱ्यांकडे पाठविले होते. महसूल विभागाच्या मंजुरीनंतर एप्रिलपासून प्रत्यक्ष भूसंपादन प्रक्रियेला वेग आला.
भूसंपादनासाठी लागू शकते एक ते दीड वर्ष
कान्हा हॉटेल चौक ते खडीमशिन चौक या भागातील 84 मीटर रुंदीकरणासाठी आवश्यक जागा ताब्यात आलेली नसल्याने पुढील काम रखडण्याची शक्यता आहे. कान्हा हॉटेल चौकातील अंडरपासचे काम पूर्ण झाले असले, तरी पुढील भूसंपादनासाठी किमान एक ते दीड वर्ष लागू शकते. त्यामुळे कात्रज ते खडीमशिन चौक या संपूर्ण मार्गाचे रुंदीकरण या वर्षी पूर्ण होण्याची शक्यता कमी असल्याचे स्पष्ट होत आहे.
