पुणे: पुणे जिल्हा सहकारी दूध उत्पादक संघाचे (कात्रज डेअरी) अध्यक्ष ॲड. स्वप्निल ढमढेरे यांनी अखेर सोमवारी (दि. 25) रात्री आपल्या पदाचा राजीनामा पक्षाचे नेते खा. पार्थ पवार यांच्याकडे दिला. संघाच्या व्यवस्थापकीय संचालकाच्या नावाने हा राजीनामा दिला आहे. तत्पूर्वी सकाळी संचालक मंडळाच्या बैठकीची सुरुवातच अध्यक्षांचा राजीनामा देण्यावरून झाली.
मात्र, ढमढेरे यांनी ‘मला पक्षाचा, वरिष्ठाचा थेट कोणताच आदेश नसल्याने राजीनामा दिला नसल्याचे सांगताच बहुसंख्य संचालक सभागृहाबाहेर पडले, कोरम पूर्ण न झाल्याने सभाही तहकूब करण्यात आली आणि राजीनाम्याचे रंगलेले नाराजीनाट्य आणि वादावादी मंत्रालयस्तरापर्यंत पोहोचली.
कात्रज दूध संघावर राष्ट्रवादी काँग््रेास अजित पवार गटाची एक हाती सत्ता आहे. दर वर्षी एका तालुक्यातील संचालकाला अध्यक्ष, उपाध्यक्षपदासाठी संधी द्यावी, असा निर्णय झाला आणि त्यानुसार त्याची आत्तापर्यंत अंमलबजावणी झाली होती. विद्यमान पदाधिकाऱ्यांचा कालावधी संपल्यामुळे त्यांनी राजीनामा देण्याबाबत इच्छुकांकडून सतत मागणी करण्यात येत होती.
राज्याच्या उपमुख्यमंत्री सुनेत्रा पवार यांनी गेल्या आठवड्यात कात्रज दूध संघाच्या संचालकांची बैठक घेऊन कामकाजाचा आढावा घेतला होता. याच वेळी पदाधिकाऱ्यांच्या राजीनाम्याचा विषय उपस्थित झाला. त्यानंतर आज होणाऱ्या बैठकीमध्ये पक्षाकडून निरोप दिला जाईल, असे सांगण्यात आले होते. त्यानुसार पक्ष प्रतिनिधी म्हणून पक्षाच्या महिला नेत्या वैशाली नागवडे यांनी तसा निरोप दिल्याचे सांगण्यात आले; परंतु प्रत्यक्षात उपमुख्यमंत्री सुनेत्रा पवार यांनी सांगितल्याशिवाय राजीनामा देणार नाही, अशी भूमिका ढमढेरे यांनी घेतली. त्या वेळी दहाहून अधिक संचालकांनी आक्रमक भूमिका घेतली.
संचालक मंडळाच्या बैठकीत खेडचे संचालक अरुण चांभारे यांनी हा मुद्दा उपस्थित केला व अन्य संचालकही आक्रमक झाले. अनेक संचालक सह्या न करता बैठकीबाहेर आले. हे सर्व सुरू असताना पक्ष निरीक्षक वैशाली नागवडे यांनी फोनवरून राजीनामाच्या पक्षाच्या निर्णयासंदर्भात कळवले. दरम्यान, संघाचे उपाध्यक्ष मारुती जगताप म्हणाले, “मला कोणताही निरोप राजीनामा देण्यासाठी आला नाही, त्यामुळे मी राजीनामा दिलेला नाही,” असे ‘पुढारी’शी बोलताना सांगितले.
माझ्या कार्यकाळात संघाचे हित, दूध उत्पादक शेतकरी, ग््रााहक आणि कात्रज बँडच्या प्रगतीसाठी प्रामाणिकपणे काम करण्याचा प्रयत्न केला. संघाच्या कामकाजात सुधारणा, खर्च नियंत्रण, विक्रीवाढ, दूध उत्पादकांच्या हिताचे निर्णय, तसेच संस्थेच्या भविष्यातील विकासासाठी माझ्या परीने योगदान देण्याचा प्रयत्न केला आहे. सद्यःस्थितीत निर्माण झालेल्या परिस्थितीचा विचार करून तसेच संघाच्या कामकाजात कोणताही प्रशासकीय अडथळा निर्माण होऊ नये, या उद्देशाने मी स्वेच्छेने अध्यक्षपदाचा राजीनामा देत आहे. हा राजीनामा मी पक्षाचे खासदार पार्थ पवार यांच्याकडे रात्री दिला आहे, तसेच हा राजीनामा फक्त अध्यक्षपदाचा असून, संचालक पदाचा राजीनामा नाही.
ॲड. स्वप्निल बाळासाहेब ढमढेरे, अध्यक्ष, कात्रज दूध संघ, पुणे.
