पुणे : सेठ हिराचंद नेमचंद जैन दिगंबर बोर्डिंगमध्ये 1,452 चौरस फूट जागेत भगवान दिगंबर जैन महावीरांचे मंदिर आहे आणि तेथेे नागरिक दर्शनासाठी येत असतात, असा अहवाल धर्मादाय आयुक्तांकडे पुणे विभागाच्या सह-आयुक्तांनी सादर केला .(Latest Pune News)
सेठ हिराचंद नेमचंद स्मारक ट्रस्टने बोर्डिंगची जागा विकण्यासाठी धर्मादाय आयुक्तांकडे परवानगी मागताना केलेल्या अर्जात मंदिराचा उल्लेख केला नसल्याचा आक्षेप जैन बोर्डिंग बचाव कृती समितीतर्फे उपस्थित केला होता. त्यावर 20 ऑक्टोबर रोजी झालेल्या सुनावणीत धर्मादाय आयुक्तांनी जैन बोर्डिंगच्या जागेच्या आवारात जैन मंदिर आहे का, तिथे कोण जात आदींची सविस्तर पाहणी करून 27 ऑक्टोबरपर्यंत अहवाल सादर करण्याचे आदेश सह धर्मादाय आयुक्तांना दिले होते. त्यानुसार, दोन निरीक्षकांनी पाहणी केली होती. त्यानंतर सह धर्मादाय आयुक्त रजनी क्षीरसागर यांनी आपला अहवाल धर्मादाय आयुक्तांना सादर केला असून, त्यामध्ये बोर्डिंगच्या जागेत भगवान महावीर यांचे मंदिर असल्याची खातरजमा केली आहे.
भगवान दिगंबर जैन महावीर यांची मूर्ती असलेले मंदिर 1452.11 चौरस फूट जागेत असून, तेथे जैन समाजाचे भाविक दर्शनाला येतात. हे मंदिर सार्वजनिक न्यास कार्यालयात नोंदणीकृत नसले, तरी शेठ हिराचंद नेमचंद स्मारक ट्रस्टच्या स्थावर मालमत्तेत असल्याने त्यांची मालकी आहे. बोर्डिंगचे अधीक्षक व विद्यार्थी या मंदिराची देखभाल करतात, असे निरीक्षण या अहवालात नोंदवले आहे.
सह धर्मादाय आयुक्त कार्यालयाच्या निरीक्षकांनी पाहणीदरम्यान ट्रस्टच्या एका विश्वस्तांचा जबाब नोंदवला. त्यामध्ये जैन बोर्डिंगच्या पुनर्विकासादरम्यान मंदिराच्या कोणत्याही भागाला नुकसान पोहोचणार नाही, तसेच ते हटविले जाणार नाही, असे आश्वासन त्यांनी दिले. ट्रस्ट आणि विकासक कंपनीमध्ये 8 ऑक्टोबर 2025 रोजीच्या विक्री करारनाम्याच्या कलम तीनमध्ये त्याचा उल्लेख आहे. मात्र, त्याबाबतची लेखी हमी विकासकच धर्मादाय आयुक्तांसमोर देऊ शकतो, असेही यात सूचवले आहे. या तेरा पानी अहवालासमवेत 431 पानांचे संबंधित दस्तावेजही जोडण्यात आले आहेत.
