पुणे: सिंहगड रोडवरील हिंगणे खुर्द परिसरातून सहकारनगर-सातारा रोडकडे जाणाऱ्या मार्गावरील वाहतूक कोंडी कमी करण्यासाठी डोंगरातून बोगदा (टनेल) उभारण्याचा पर्याय पुढे आला आहे.
हिंगणे-खोराडवस्ती परिसरातून प्रस्तावित असलेल्या या बोगद्याची महापौर मंजूषा नागपुरे यांनी शुक्रवारी (दि. १८) पूर्वपाहणी केली. या वेळी नगरसेवक प्रसन्न जगताप, नगरसेविका ज्योती गोसावी, महापालिका प्रकल्प अधिकारी गोजारे यांच्यासह संबंधित अधिकारी व कर्मचारी उपस्थित होते.
सिंहगड रोड, सहकारनगर आणि तळजाई परिसरातील वाढती वाहतूक लक्षात घेता नागरिकांना आणखी एक पर्यायी मार्ग उपलब्ध करून देण्याच्या दृष्टीने या प्रस्तावाचा विचार करण्यात येत आहे. प्रस्तावित बोगद्यामुळे हिंगणे ते सहकारनगर तसेच तळजाई परिसरातील दळणवळण सुलभ होण्याबरोबरच प्रवासाचे अंतर आणि वेळ कमी होण्याची शक्यता आहे.
महापौर नागपुरे यांनी प्रस्तावित मार्गाची प्रत्यक्ष पाहणी करून प्रकल्पाची व्यवहार्यता, तांत्रिक बाबी तसेच आवश्यक पायाभूत सुविधांबाबत संबंधित अधिकाऱ्यांकडून माहिती घेतली. प्रकल्प राबवताना परिसरातील वाहतूक, नागरिकांची सुरक्षितता आणि भविष्यातील वाढती वाहतूक यांचा विचार करण्याच्या सूचना त्यांनी अधिकाऱ्यांना दिल्या.
दरम्यान, हिंगणे-खोराडवस्ती परिसरातील रस्ता रुंदीकरण तसेच नाल्यावर कल्व्हर्ट उभारून तो बंदिस्त करण्याच्या प्रस्तावित कामांचीही महापौरांनी पाहणी केली. पर्यायी मार्ग विकसित करण्यासह परिसरातील विद्यमान रस्ते आणि पायाभूत सुविधा सक्षम करण्यासाठी आवश्यक कार्यवाही करण्याचे निर्देश त्यांनी अधिकाऱ्यांना दिले.
