पुणे : पुढारी वृत्तसेवा : चिरतरुण होण्यासाठी दिवसाचे टाईमटेबल ठरवावे, ताण कमी करावा, पाणी जास्त प्यावे, त्यासोबत सूर्योदयाच्या एक तास अगोदर उठावे, त्यात म्हणजे आपली झोप सात तास व्हायलाच हवी, जेवणावर नियंत्रण ठेवावे, असे विख्यात हृदयरोग तज्ज्ञ डॉ. अविनाश इनामदार यांनी बुधवारी सांगितले. सहकारनगर येथील मुक्तांगण बालरंजन केंद्र येथे आयोजित सहजीवन व्याख्यानमालेत वक्ता म्हणून ते बोलत होते. यावेळी सोमानंद अवधूत, राजू आणि श्यामल देव, उदय कुलकर्णी आणि राजू पुणतांबेकर उपस्थित होते.
डॉ. इनामदार म्हणाले, माझे वय 71 आहे, मात्र, तसे आत्ता पाहिले तर वाटत नाही. याबाबत अनेकजण मला विचारतात, या एज रिव्हर्सलसाठी आम्ही वेबिनार घेतो. त्यावेळी अनेकजण मला काही औषध, काही काढे द्या, असे म्हणतात. मात्र, असे शॉर्टकट काही कामाचे नाहीत, एज रिव्हर्सलसाठी वेळ द्यावा लागतो, वयाच्या 50 व्या वर्षी मी एज रिव्हर्सल प्रक्रिया सुरू केली. त्यानंतर आता 71 व्या वर्षी त्याचा रिझल्ट दिसत आहे. ते पुढे म्हणाले, लवकर वृध्दत्व येणे, अकाली मृत्यू याचे प्रमाण वाढत आहे. ह्यूमन बॉडी ही संगणकाप्रमाणे आहे. ती पंचमहाभूतांपासून तयार झालेली आहे.
त्याचा आम्ही अभ्यास केला. यातील पाच घटक वाढवण्यासाठी प्रयत्न केले पाहिजेत. तसेच, प्रत्येकाने सात तास झोप घ्यायलाच हवी, सकाळी सूर्योदयाच्या 1 तास अगोदर उठा. ही सूर्यकिरणे आरोग्यासाठी महत्त्वाची आहेत. अग्निहोत्र, जलनेती, अग्निसार, योगा करावा. ताण कमी करावा. चहा-कॉफी पिऊ नये. रागावर नियंत्रण ठेवणे, विनोदाला महत्त्व देऊन आनंदी जीवन जीव जगा. सकारात्मक राहा, अध्यात्मिक राहा, नातेसंबंध जोपासा, एरोबिक व्यायाम करा.
हेही वाचा
