पुणे: अल्पवयीन मुलाचा वापर करून गांजाची विक्री केल्याचा प्रकार हडपसरमधील सुरक्षानगर परिसरात उघडकीस आला. पोलिसांनी गांजा, मोपेड, मोबाईल आणि इतर साहित्य असा ११ लाख ४४ हजार २१० रुपयांचा मुद्देमाल जप्त केला. ही कारवाई गुन्हे शाखेच्या युनिट ६ ने केली.
याप्रकरणी पोपट मारुती पाडुळे (वय ५६, रा. नवीन म्हाडा कॉलनी, सुरक्षानगर) असे अटक करण्यात आलेल्याचे नाव आहे, तर विधिसंघर्षित बालकासह आणखी एकावर वानवडी पोलिस ठाण्यात गुन्हा दाखल करण्यात आला आहे. याबाबत गुन्हे शाखेच्या पोलिस हवालदार पल्लवी सागर मोरे यांनी फिर्याद दिली आहे.
युनिट ६चे पथक सुरक्षानगर परिसरात गस्त घालत असताना पोलिस हवालदार पल्लवी मोरे आणि अंमलदार बाळासाहेब सकटे यांना रविवारी (दि. ३० ऑगस्ट) एक व्यक्ती नवीन म्हाडा कॉलनीतील इमारत क्रमांक अकरासमोरील मोकळ्या जागेत मोपेड गाडीवर थांबला असून, त्यांच्याकडे गांजा आहे, अशी खबर मिळाली.
त्यानुसार त्याला ताब्यात घेतले. त्यानंतर गांजा पुरविणाऱ्या पोपट पाडुळे याला अटक केली. त्याच्याकडून २१ किलो १८० ग्रॅम गांजासह ११ लाख ४४ हजारांचा मुद्देमाल जप्त करण्यात आला.
ही कारवाई पोलिस उपायुक्त गौहर हसन यांच्या मार्गदर्शनात पोलिस निरीक्षक संतोष शेटे, सहायक निरीक्षक संतोष कदम, उपनिरीक्षक आशिष जाधव, सहायक पोलिस फौजदार ज्ञानेश्र्वर शिर्के, अंमलदार तानाजी देशमुख, समीर पांडुळे, बाळासाहेब सकटे, अमित कांबळे, अमित सस्ते, प्रशांत कर्णवर, पल्लवी मोरे, मनीषा लोखंडे यांच्या पथकाने केली.
