पुणे : पुढारी वृत्तसेवा : पोषण आहार देण्यात येणार्या शाळांमध्ये विद्यार्थ्यांना अन्न शिजविणार्या यंत्रणांनी आठवड्यातून किमान एक दिवस फळे, सोयाबिस्कीट, दूध, चिक्की, राजगीरा लाडू, गूळ, शेंगदाणे, बेदाणे, चुरमुरे आदी स्वरुपात पूरक आहार द्यावा, असे निर्देश राज्याच्या प्राथमिक शिक्षण संचालनालयाचे संचालक शरद गोसावी यांनी जिल्हा परिषदांचे प्राथमिकचे शिक्षणाधिकारी तसेच
बृहन्मुंबईच्या शिक्षणाधिकार्यांना दिले आहेत.
गोसावी यांनी दिलेल्या निर्देशानुसार, राज्यामध्ये सद्य:स्थितीमध्ये योजनेस पात्र सर्व शाळांमधून प्रधानमंत्री पोषणशक्ती निर्माण (पूर्वीची शालेय पोषण आहार) योजनेंतर्गत तांदळापासून बनविलेल्या पाककृतीच्या स्वरुपात नियमित आहाराचा लाभ विद्यार्थ्यांना देण्यात येतो. तसेच आठवड्यातून एक दिवस अंडी व केळी उपलब्ध करून देण्यात येत आहेत. राज्यामध्ये मोठ्या प्रमाणात द्राक्ष उत्पादन होत आहे. राज्यातील काही शाळा विद्यार्थ्यांना आठवड्यातून एक दिवस पूरक आहारामध्ये बेदाण्याचा लाभ देत आहेत.
त्यानुसार प्रस्तुत योजनेंतर्गत आता नियमित आहारासोबत आठवड्यातून एक दिवस पूरक आहार म्हणून फळे, सोयाबिस्कीट, दूध, चिक्की, राजगीरा लाडू, गूळ, शेंगदाणे, बेदाणे, चुरमुरे आदी स्वरुपात लाभ देण्याबाबत आपल्या स्तरावरून पुन्हा एकदा सर्व शाळा आणि केंद्रीय स्वयंपाकगृह संस्थांना लेखी निर्देश द्यावेत असे स्पष्ट केले आहे. त्यामुळे रोजच खिचडी खाणार्या विद्यार्थ्यांना आता नावीन्यपूर्ण आहार मिळणार असल्याचे स्पष्ट झाले आहे.
हेही वाचा
