दुष्काळी परिस्थितीत फुलांचे भाव पडले; पुरंदरचा शेतकरी दुहेरी संकटात  

वाल्हे : पुढारी वृत्तसेवा : पुरंदर तालुक्यात तीव्र पाणीटंचाई असतानाही काही शेतकर्‍यांनी अल्पशा पाण्यावर फूलशेती पिकवली, परंतु आता या फुलांना बाजारभाव मिळत नसल्याने उत्पादक शेतकरी पाणीटंचाई आणि आर्थिक अडचण अशा दुहेरी संकटात सापडला आहे. पुरंदर तालुक्यामध्ये मागील काही वर्षांपासून, गुलाब, झेंडू, गुलछडी, जरबेरा, मोगरा, बिजली तसेच इतर फुलांची मोठ्या प्रमाणात लागवड केली जाते. या वर्षी अतिअल्प पर्जन्यमान असल्याने  फूलशेतीची लागवड कमी प्रमाणात झाली. बाजारभाव चांगला मिळेल या आशेने शेतकर्‍यांनी फुलांची लागवड केली; परंतु आता एवढे कष्ट करून व पाण्याचे काटेकोर नियोजन करून हातात दमडी मिळत नसल्याने  फूल उत्पादक शेतकरी चिंता व्यक्त करीत आहेत.

सद्यःस्थितीत मोठ्या प्रमाणावर लग्नसराई नसल्याने, तसेच कोणतेही सण, उत्सव नसल्याने  काबाडकष्ट करून पिकवलेला माल आता कमी बाजारभावात द्यावा लागत असल्याने  शेतकरी निराश होत आहेत. मागील काळामध्ये फुलशेतीने शेतकर्‍यांना पैसे मिळवून दिले होते. मात्र, तालुक्यात आता कोणत्याच पिकांना व फुलांना बाजारभाव नसल्याने शेतकर्‍यांपुढे अनेक प्रश्न व समस्या उभ्या राहिल्या आहेत. पुरंदर तालुक्यातील राजेवाडी, वाघापूर, टेकवडी, माळशिरस, दिवे, बेलसर, धालेवाडी, गुळुंचे, वाल्हे आदी गावात फूलशेती  केली जाते.

मोगरा फुलांना अपेक्षित बाजारभाव 1500 ते 1800 किलो असून, सद्यःस्थितीत मोगरा फुलास 400 ते 700 रुपये किलो बाजारभाव मिळत आहे. झेंडू 20 ते 40, गुलाब गड्डी 10 ते 20रुपये, शेवंती 80 ते 100 किलो, बिजली 30 ते 60 रुपये किलो, अस्टर 25 ते 30 रुपये किलो, गुलछडी 200 ते 350 रुपये किलो, जरबेरा 30 ते 50 रुपये गड्डी.