पुणे: शहराच्या स्वच्छतेबाबत महापालिका आयुक्त नवल किशोर राम हे ‘अॅक्टिव्ह मोड’वर आले आहेत. शहरातील फीडर पॉइंट्सचा चेहरामोहरा बदलण्यासाठी राम मैदानात उतरले असून, शहरातील विविध भागांतील पाहणी करण्यास त्यांनी सुरुवात केली आहे.
सोमवारी त्यांनी नगर रोड-वडगाव शेरी प्रादेशिक कार्यालयाअंतर्गत असलेल्या झिरकन, साकोरेनगर आणि यमुनानगर फीडर पॉइंट्सची पाहणी केली. स्वच्छ पुणे, सुंदर पुणे मोहिमेअंतर्गत पुणे महापालिका सातत्याने विविध उपक्रम राबवत आहे. त्याच अनुषंगाने आयुक्त नवल किशोर राम यांनी शहरातील फीडर पॉइंट्सची पाहणी करण्यास सुरुवात केली आहे. (Latest Pune News)
सोमवारी केलेल्या पाहणीत आयुक्तांनी महापालिकेच्या घनकचरा आणि शहरातील फीडर पॉइंट्सना स्मार्ट कलेक्शन पॉइंट्स म्हणून विकसित करण्याच्या, त्यांचे सुशोभीकरण करण्याच्या तसेच नागरिकांना घनकचरा व्यवस्थापनाबाबत अधिक जागरूक करण्यासाठी ठोस उपाययोजना करण्याच्या सूचना दिल्या.
यावेळी सफाई मित्रांच्या दैनंदिन उपस्थितीची नोंद व घराघरातून घंटागाडीमार्फत होणार्या कचरा संकलन व्यवस्थेचाही आढावा घेण्यात आला. पाहणीदरम्यान महानगरपालिका आणि ‘ह्युमन मॅट्रिक्स’ टीमकडून स्मार्ट फीडर पॉइंट्स विकसित करण्याच्या कामाची माहिती आयुक्तांनी घेतली.
या वेळी घनकचरा व्यवस्थापन विभागाचे उपायुक्त संदीप कदम, परिमंडळ 1 चे उपायुक्त माधव जगताप, क्षेत्रीय अधिकारी शीतल वाकडे, वरिष्ठ आरोग्य निरीक्षक, मुख्य आरोग्य निरीक्षक, ह्यूमन मॅट्रिक्स व स्वच्छ टीमचे पदाधिकारी उपस्थित होते. दरम्यान, पाहणी दौर्यानंतर अतिरिक्त महापालिका आयुक्तांनी या कामांसाठी आवश्यक नियोजन करण्याच्या सूचना दिल्या असून क्षेत्रीय स्तरावर विशेष बैठक देखील घेतली.
