पुणे: राज्य सामाईक प्रवेश परीक्षा कक्ष अर्थात सीईटीसेलतर्फे शैक्षणिक वर्ष २०२६-२७ साठी अभियांत्रिकी अभ्यासक्रमाची केंद्रिभूत प्रवेश प्रक्रिया सुरू आहे. विद्यार्थ्यांसाठी राज्यात ३८० अभियांत्रिकी महाविद्यालयामध्ये १११ अभ्यासक्रम उपलब्ध असून, २ लाख १६ हजार ५५२ जागा उपलब्ध आहेत. यावर्षी सर्वात जास्त जागा संगणक अभियांत्रिकी या अभ्यासक्रमाच्या असून, ३० हजार ९९३ जागा उपलब्ध असल्याचे स्पष्ट झाले आहे.
अभियांत्रिकी अभ्यासक्रमा-साठीच्या प्रवेशासाठी ऑनलाईन नोंदणी २ जुलै २०२६ पासून सुरू झाली होती. दिनांक १९ जुलै २०२६ रोजी ही ऑनलाईन नोंदणी संपली, तर ३० जुलैपर्यंत प्रवेशाच्या पहिल्या फेरीसाठी विद्यार्थ्यांना पसंतीक्रम ऑनलाईन भरता येणार आहेत. यावर्षी २ लाख ४४ हजार ३५५ विद्यार्थ्यांनी नोंदणी केली आहे.
येत्या २ ऑगस्टला पहिल्या फेरीच्या जागावाटपाची यादी जाहीर करण्यात येणार आहे. तसेच ३ ते ५ ऑगस्टदरम्यान विद्यार्थ्याला मिळालेली जागा स्वीकारून नेमून दिलेल्या संस्थेत उपस्थित राहून आवश्यक कागदपत्रे सादर करून व शुल्क भरून प्रवेश निश्चित करणे आवश्यक आहे.
राज्यात पहिल्या फेरीसाठी एकूण २ लाख १६ हजार ५५२ जागा उपलब्ध असून, यामध्ये १ लाख ९२ हजार ०३० जागा सर्व प्रवर्गासाठी, तर आर्थिकदृष्ट्या दुर्बल घटकासाठी १५ हजार ७३४ व ८ हजार ७८८ जागा टीएफडब्ल्यूएसमधील आहेत. यावर्षी २ लाख ४४ हजार ३५५ विद्यार्थ्यांनी अभियांत्रिकी प्रवेशासाठी नोंदणी केली आहे.
