पुणे: अल निनो सध्या सुरूच असला, तरी त्याची तीव्रता फेब्रुवारी २०२७ मध्ये सर्वोच्च पातळी गाठणार आहे. त्यामुळे चारा, पाणी यांचे नियोजन आत्तापासूनच करावे लागणार आहे. अल निनोमुळे यंदाचा उन्हाळा देखील तीव्र राहणार असल्याचा इशारा हवामानशास्त्रज्ञांनी दिला आहे.
रविवारी (दि. २७) राज्याचे मुख्यमंत्री देवेंद्र फडणवीस यांनी नागपूर येथे सांगितले की, सध्या अल निनो सुरूच आहे. मात्र, त्याची तीव्रता फेब्रुवारी २०२७ मध्ये सर्वोच्च पातळीवर जाणार आहे. राज्यातील वाढत्या दुष्काळी संकटाच्या पार्श्वभूमीवर सरकार पूर्णपणे तयार असल्याचेही त्यांनी स्पष्ट केले.
हवामानशास्त्रज्ञांनी याबाबतचा इशारा आधीच दिला होता. त्याची दखल घेत मुख्यमंत्र्यांनी दुष्काळाचे नियोजन करण्याच्या सूचना राज्यातील सर्वच जिल्ह्याधिकाऱ्यांना दिल्या आहेत. अल निनोचा प्रभाव फेब्रुवारी २०२७ मध्ये शिखर गाठणार असल्याने त्याचा परिणाम म्हणून सरासरी तापमानात मोठी वाढ अपेक्षित आहे. मार्च ते मे हा उन्हाळ्याचा हंगाम यंदा दरवर्षीच्या तुलनेत अधिक तीव्रतेचा राहणार आहे. तापमानवाढीमुळे पाणी जास्त लागणार आहे.
पाण्याचे नियोजन महत्त्वाचे ठरणार
ज्येष्ठ हवामानशास्त्रज्ञ डॉ. कृष्णानंद होसाळीकर यांनी सांगितले की, सध्या अल निनो सुरूच आहे. त्यामुळेच यंदा जून, ऑगस्ट आणि सप्टेंबरमध्ये पाऊस कमी झाला. अपवाद फक्त जुलै महिन्याचा ठरला. फेब्रुवारीत अल निनो तीव्रतेची सर्वाधिक पातळी गाठेल, त्यामुळे यंदाचा उन्हाळा कडक जाणवणार आहे. त्यासाठी राज्यात पाण्याचे नियोजन व्यवस्थित केले, तर दुष्काळाचा सामना सहज करता येईल.
