बारामती : ज्या शेतकऱ्यांनी ई-पीक पाहणी ॲपवर आपल्या पिकांची नोंदणी केलेली नाही, त्यांच्यासाठी शासनाने मोठा दिलासादायक निर्णय घेतला आहे. आता ई-पीक पाहणीची ऑफलाइन पद्धतीने नोंदणी करता येणार आहे. त्यामुळे आत्तापर्यंत वंचित राहिलेल्या शेतकऱ्यांचा महत्त्वाचा प्रश्न सुटणार आहे.
या निर्णयाचा पुणे आणि बारामती तालुक्यातील शेतकऱ्यांना मोठा फायदा होणार आहे. ई-पीक पाहणी ॲपवर नोंदणी न करू शकलेल्या शेतकऱ्यांसाठी 15 जानेवारीपर्यंत ऑफलाइन नोंदणीची मुदत देण्यात आली आहे. या कालावधीत शेतकरी संबंधित तलाठी कार्यालय, कृषी सहाय्यक किंवा महसूल विभागाच्या मदतीने आपल्या शेतातील पिकांची माहिती नोंदवून घेऊ शकणार आहेत. त्यामुळे तांत्रिक अडचणी किंवा इतर कारणांमुळे नोंदणी राहून गेलेल्या शेतकऱ्यांची चिंता दूर झाली आहे.
राज्यातील अनेक शेतकऱ्यांना स्मार्टफोनचा अभाव, इंटरनेटची समस्या तसेच ॲपवरील तांत्रिक अडचणींमुळे ई-पीक पाहणी नोंदणी करता आली नव्हती. परिणामी, राज्यातील सुमारे अनेक शेतकरी या प्रक्रियेपासून वंचित राहिले होते. ई-पीक पाहणी नोंदणी ही पिकांच्या नुकसानीचे पंचनामे, शासकीय अनुदान, पीक विमा व कर्जासाठी आवश्यक असल्याने या शेतकऱ्यांना मोठ्या अडचणींचा सामना करावा लागत होता.
आता ऑफलाइन नोंदणीची सुविधा उपलब्ध करून दिल्यामुळे प्रत्येक शेतकऱ्याला आपल्या पिकांची अचूक नोंद करता येणार आहे. यामुळे भविष्यात शासकीय योजना, आपत्ती मदत, पीक विमा आणि आर्थिक सहाय्याचा लाभ शेतकऱ्यांना मिळणार असून, ई-पीक पाहणी प्रक्रियेतून कोणीही वंचित राहणार नाही.
