खडकवासला: धायरी, नऱ्हे, सिंहगड रोड परिसरात वर्षानुवर्षे रस्ते, विकास आराखडा, स्वच्छता, आरोग्य, ड्रेनेज, पदपथ, आदी मूलभूत सुविधांची प्रभावीपणे अंमलबजावणी केली जात नाही. पालिकेच्या या भोंगळ कारभाराच्या निषेधार्थ पालिका मुख्यालयात सत्ताधारी भाजपचे नगरसेवक राजाभाऊ लायगुडे यांनी ठिय्या आंदोलन सुरू केले आहे. शुक्रवारी रक्षाबंधनही त्यांनी मुख्यालयातच साजरे केले.
पालिका मुख्यालयातील शहर अभियंता अनिरुद्ध पावसकर यांच्या कार्यालयाच्या आवारात काळे कपडे घालून लायगुडे यांचे सलग पाच दिवसांपासून ठिय्या आंदोलन सुरू आहे. त्यानंतर त्यांनी आज नेहमीचे पांढरे कपडे घालून रक्षाबंधनही साजरे केले.
महिला भगिनींनी त्यांना औक्षण करून राख्या बांधल्या. लायगुडे यांच्या आंदोलनाला सिंहगड रोडसह शहरातील विशेषत: नव्याने समाविष्ट झालेल्या ३२ गावांतील नागरिकांचा उत्स्फूर्त प्रतिसाद मिळत आहे.
धायरी-नऱ्हे परिसरातील रस्ते, पाणी, डी.पी. रस्त्यांच्या कामांचा प्रश्न अनेक वर्षांपासून प्रलंबित असल्याने नगरसेवक राजाभाऊ लायगुडे यांनी आक्रमक भूमिका घेतली आहे. नागरिकांना मूलभूत सुविधांसाठी संघर्ष करावा लागत असताना नवीन बांधकामांना परवानगी देण्याच्या महापालिकेच्या धोरणावरही त्यांनी प्रश्नचिन्ह उपस्थित केले आहे.
लायगुडे यांनी प्रशासनाकडे डी.पी. रस्त्यांचे रखडलेले काम तातडीने सुरू करावे, तसेच ठोस कारवाई होईपर्यंत नवीन बांधकामांना परवानगी देताना प्रशासनाने पुनर्विचार करावा, अशी मागणी केली आहे.
