पुणे : आषाढी वारीसाठी पंढरपूरला जाणाऱ्या लाखो भाविकांसाठी आनंदाची बातमी आहे. पुणे विभागातील स्वारगेट एसटी आगार प्रशासनाने यंदाच्या आषाढी वारीनिमित्त प्रवासासाठी विशेष सुविधा उपलब्ध करून दिल्या आहेत. यामुळे ग्रामीण भागातील भाविकांना मोठा दिलासा मिळणार असून, त्यांना आता अधिक सोयीस्करपणे वारीला जाता येणार आहे.
स्वारगेट आगार प्रशासनाच्या नियोजननुसार, वारीसाठी पंढरपूरला जाणाऱ्या ग्रामीण भागातील नागरिकांना आता चक्क संपूर्ण एसटी बसच प्रवासासाठी बुक करता येणार आहे. ही एक महत्त्वाची सुविधा असून, यामुळे मोठ्या गटाने जाणाऱ्या भाविकांची गैरसोय टळणार आहे.
याशिवाय, स्वारगेट आगाराने ग्रुप बुकिंग व्यवस्थाही सुरू करण्याचा निर्णय घेतला आहे. याचा अर्थ, जर अनेक भाविक एकत्र प्रवास करणार असतील, तर त्यांना एकत्रितपणे बुकिंग करता येईल. यामुळे प्रवासाचे नियोजन अधिक सुलभ होईल आणि भाविकांना रांगेत उभे राहण्याची किंवा वेगवेगळ्या बस शोधण्याची गरज भासणार नाही.
आषाढी वारीच्या काळात पंढरपूरकडे जाणाऱ्या भाविकांची प्रचंड गर्दी असते. ही बाब लक्षात घेऊन स्वारगेट एसटी आगाराने प्रवाशांना उत्तम सुविधा पुरवण्यासाठी हे नियोजन केले आहे. या विशेष सुविधांमुळे भाविकांना सुरक्षित आणि आरामदायी प्रवास करता येईल, अशी अपेक्षा आहे.
दरम्यान, या विशेष सुविधेचे नियोजन स्वारगेट एसटी आगाराचे वरिष्ठ आगार व्यवस्थापक जयेश पाटील, कनिष्ठ आगार व्यवस्थापक पल्लवी पाटील, सहाय्यक वाहतूक अधीक्षक मोहिनी ढेरे आणि आगारातील इतर अधिकारी कर्मचाऱ्यांकडून करण्यात येत आहे.
