दीपक पाटील
पौड रोड: महापालिका निवडणुकीत प्रभाग क्रमांक 10 : बावधन-भुसारी कॉलनीमध्ये भाजपची उमेदवारी कोणाला मिळणार? याकडे सर्वांचे लक्ष लागले होते. त्यात या ठिकाणी ओबीसीमधून किरण दगडे, सर्वसाधारण महिला अल्पना वरपे, रूपाली पवार तसेच पुरुषमध्ये सर्वसाधारण जागेवरून दिलीप वेडे पाटील यांना भाजपने उमेदवारी दिली. परंतु, येथील महिला गटातील भाजपची माजी नगरसेविका श्रद्धा प्रभुणे-पाठक यांना उमेदवारी नाकारत नवीन चेहरा रूपाली पवार यांना उमेदवारी दिली.
भाजपचे पॅनेल मजबूत झाल्याने विरोधी पक्षातून कोण निवडणूक लढवणार? याची प्रभागात उत्सुकता होती. राजकीय समीकरण लक्षात घेता राष्ट्रवादी अजित पवार गटाकडून माजी नगरसेवक शंकर केमसे, माजी नगरसेविका जयश्री मारणे यांच्यासह अभिजित दगडे, सुजाता भुंडे यांना उमेदवारी देण्यात आली.
राष्ट्रवादीचे पॅनेल मोठ्या मताधिक्याने निवडून यावे, यासाठी उपमुख्यमंत्री अजित पवार यांनी प्रभागात रोड-शो देखील केला होता. भाजपच्या उमेदवारांनी मात्र केलेल्या विकासकामांवर प्रचारात भर दिला. त्यामुळे भाजपला 2017 प्रमाणे चारही जागा येथे राखता आल्या.
ऐनवेळी ठाकरे शिंदे गटाने एकला चलोची भूमिका घेतल्याने त्यांचे देखील तीन उमेदवार रिंगणात होत, तर मनसेकडून तीन, काँग््रेास आणि शिवसेना ठाकरे गटातून एक-एक उमेदवार रिंगणात असल्याने प्रभागात मोठी चुरस दिसून आली. भाजपसह इतर पक्षांतील निवडणूक लढवणाऱ्यांची संख्या 16 होती.
मी निवडून येणार म्हणणारे ठरले अपयशी
कोथरूडमधील प्रभाग क्रमांक 10 व 11 च्या मतमोजणीकडे सर्वांचे लक्ष लागले होते. पहिल्या फेरीपासून भाजपच्या उमेदवारांनी आघाडी घेतली होती. मी निवडून येणारच, म्हणणाऱ्या उमेदवारांना घाम फुटला होता. समोर दिसणारे दृश्य आणि कानावर पडणारे मतांचे आकडे ऐकून भाजप मतांच्या सुनामीपुढे आपला टिकाव लागणार नाही, हे समजून अनेकांनी मतमोजणी केंद्र सोडून घरचा रस्ता धरला.
