Pune Mula River Sand Mining: बालेवाडीत मुळा नदीपात्रात वाळूउपसा सुरू?

मोहसीन शेख

बाणेर: वाकड स्मशानभूमीजवळ बालेवाडी हद्दीत असलेल्या मुळा नदीमध्ये खड्डे करून वाळूउपसा केल्याचा प्रकार दिसून येत आहे. रात्रीच्या वेळी हा वाळूउपसा चालत असल्याने ‌‘रात्रीस खेळ चाले‌’ असाच प्रकार बालेवाडीत वाळूचोरीबाबत सुरू असल्याचे लक्षात येत आहे. यामुळे संबंधितांवर कारवाई करावी, अशी मागणी स्थानिक नागरिक करत आहेत.

एकीकडे नदीसुधार प्रकल्प सुरू असताना दुसरीकडे मात्र नदीत खड्डे करून वाळूउपसा केली जात असल्याचे लक्षात येत आहे. प्रशासन मात्र नदीसुधार प्रकल्पाकडे लक्ष देत आहे. परंतु, या मुळा नदीपात्राच्या प्रवाहामध्ये होत असलेल्या वाळूउपशावर कोण लक्ष देणार, याबाबत प्रश्न उपस्थित होत आहे. या आधीही काही वर्षांपूर्वी औंध परिसरामध्ये अशाच प्रकारचे रात्रीच्या वेळी वाळूउपसा चालायची, तर काही महिन्यांपूर्वी म्हाळुंगेत मुळा नदीपात्रातील वाळू काढल्याचे सांगितले जात आहे, तर आता मात्र बालेवाडी परिसरात हा प्रकार सुरू असल्याचे लक्षात येत आहे.

पर्यावरणप्रेमी नागरिक या ठिकाणी फिरायला गेले असता त्यांच्या लक्षात आले की, या ठिकाणावरून वाळूउपसा होत आहे. चाळलेली वाळू या ठिकाणी साईडला ठेवण्यात आलेली आहे, तर दोन ते तीन मोठे खड्डे नदीपात्रात दिसून आले, त्यातून याआधीही वाळूचोरी झाल्याचे लक्षात येत आहे. या ठिकाणची परिस्थिती पाहिली असता जेसीबीच्या साहाय्याने खोदून, ट्रकने या परिसरातील वाळू नेली जात असल्याचे लक्षात येत आहे. या नदीपात्रातील वाळूउपसा करणाऱ्यांवर कारवाई करण्याची मागणी पर्यावरणप्रेमी नागरिक करू लागले आहेत.

'महसूल‌’शी बोलून कारवाई करू

याबाबत औंध-बाणेर क्षेत्रीय कार्यालयातील सहाय्यक आयुक्तांना विचारले असता त्यांनी सांगितले की, सदर विषय हा महसूल विभागाकडे येत असून, त्यांच्याशी संपर्क करून कारवाई केली जाईल.