पुणे : पुढारी वृत्तसेवा : शहरातील वाहतूक कोंडी सोडविण्यासाठी वाहतूक पोलिसांची अतिरिक्त कुमक तातडीने उपलब्ध करून देण्यात येईल, असे आश्वासन पोलिस आयुक्त अमिताभ गुप्ता यांनी दिले. भाजपकडून वाहतूक कोंडीबाबत गुप्ता यांना निवेदन देण्यात आले. त्या वेळी त्यांनी हे आश्वासन दिले. प्रत्येक चौकात गरजेनुसार एक ते दोन अशा 400 वॉर्डनच्या नेमणुका करण्यात येणार असल्याची माहिती भाजप शहराध्यक्ष जगदीश मुळीक यांनी दिली. मुळीक यांच्यासह सरचिटणीस दत्तात्रय खाडे, संदीप लोणकर, हेमंत लेले, पुष्कर तुळजापूरकर, अरविंद गोरे आदी उपस्थित होते. शहरातील महत्त्वाच्या चौकांत कोंडी होते. या सर्व चौकांची पाहणी स्वतंत्र संस्थेकडून करून कोंडी सोडविण्यासाठी उपाययोजना करण्याची गरज आहे. कोंडीमागची कारणेही शोधायला हवीत, असे मुळीक म्हणाले.
शहरातील वाहतूक कोंडी सोडविण्यासाठी वाहतूक पोलिसांची अतिरिक्त कुमक उपलब्ध करून देण्यात येणार आहे. वाहनचालकांवरील कारवाई तुर्तास थांबवून वाहतूक नियमन करण्यास प्राधान्य देण्याचा आदेश वाहतूक पोलिसांना दिल्याचे गुप्ता यांनी सांगितले.
शहरातील वाहतूक समस्या सोडविण्यासाठी उपमुख्यमंत्री देवेंद्र फडणवीस व पालकमंत्री चंद्रकांत पाटील यांच्या उपस्थितीत वाहतूक पोलिस, पुणे महापालिका, मेट्रो, सार्वजनिक रस्ते विभाग, राज्य परिवहन मंडळ, पुणे महानगर परिवहन महामंडळ, स्मार्ट सिटी अशा सर्व महत्त्वाच्या विभागांची एकत्रित उच्चस्तरीय बैठक लवकरच आयोजित केली जाणार असल्याचे मुळीक यांनी सांगितले.
