खडकवासला : पुढारी वृत्तसेवा : पानशेत, वरसगाव खोर्यातील रिमझिमीने दोन्ही धरणांतील पाणीसाठ्यात वाढ होत आहे. वरसगाव (वीर बाजी पासलकर) धरणाची शंभरीकडे वाटचाल सुरू आहे, तर शंभर टक्के भरलेल्या पानशेत धरणाच्या विसर्गात वाढ करण्यात आली आहे. चार धरणांच्या खडकवासला धरणसाखळीत रविवारी सायंकाळी पाच वाजेपर्यंत 27.16 टीएमसी (93.17 टक्के) पाणीसाठा झाला होता. पानशेतमधून सध्या 2554 क्युसेक विसर्ग सुरू आहे. गेल्या दोन दिवसांपासून रायगड जिल्ह्यालगतच्या पानशेत -वरसगाव धरण क्षेत्रात पाऊस सक्रिय झाला आहे. जोरदार पाऊस पडत नसला, तरी अधूनमधून सरी कोसळत असल्याने दोन्ही धरणांतील पाण्यासाठ्यात संथगतीने वाढ सुरू आहे. पानशेतच्या विसर्गाची भर खडकवासला धरणात पडत आहे. मात्र, या धरणाच्या पाणलोट क्षेत्रात पाऊस नसल्याने पाणीसाठा मंदावला आहे.
पानशेत धरण प्रकल्पाचे शाखा अभियंता अनुराग मारके म्हणाले, 'जलसाठा वाढल्याने पानशेतमधून वांजळवाडी साडव्यांत 1954, तर वीजनिर्मिती सांडव्यातून 600 क्सुसेक विसर्ग सुरू आहे. धरण शंभर टक्के भरल्याने पाण्याची आवक वाढल्यामुळे जादा पाणी सोडण्यात येत आहे. असाच पाऊस सुरू राहिल्यास दोन दिवसांत वरसगाव धरण शंभर टक्के भरणार आहे.' खडकवासला जलसंपदा विभागाचे उपविभागीय अभियंता मोहन भदाणे म्हणाले, 'पानशेत, वरसगाव धरण क्षेत्रात सध्या पडत असलेल्या पावसामुळे खडकवासल धरणाच्या लाभ क्षेत्रातील शेतीसह पुणेकरांना लाभ मिळाला आहे.'
वरसगाव धरणाचे जलपूजन
वरसगाव (वीर बाजी पासलकर) धरणात जवळपास 97.97 टक्के पाणीसाठा झाला आहे. रविवारी जलसंपदा विभाग व ग्रामस्थांच्या वतीने धरणाचे पारंपरिक जलपूजन करण्यात आले. प्रकल्पाच्या शाखा अभियंता प्रतीक्षा मारके, जिल्हा शल्यचिकित्सक डॉ. माधव कणकवले व अनुराग मारके यांच्या हस्ते जलपूजन झाले. लालासाहेब पासलकर, गणेश मोरे, चंद्रकांत पासलकर, सुभाष पासलकर आदी या वेळी उपस्थित होते.
हेही वाचा :
