गणेश खिंड रस्त्यावरील वाहतूक व्यवस्थेत बदल; असा असेल बदल
पुणेः पुढारी वृत्तसेवा : सावित्रीबाई फुले पुणे विद्यापीठ चौकात उड्डाणपूल व मेट्रोच्या पिलरचे काम सुरू असल्यामुळे परिसरातील रस्त्यावर वाहतूक कोंडी होत आहे. त्यामुळे शनिवारपासून पुढील आदेश होईपर्यंत परिसरातील वाहतुकीमध्ये बदल करण्याचे आदेश वाहतूक शाखेचे उपायुक्त शशिकांत बोराटे यांनी काढले आहेत. वाहतूक कोंडी कमी करण्यासाठी औंध रोडवरून औंध, सांगवी, पिंपरी चिंचवड, हिंजवडी परिसरामधील शिवाजीनगरकडे येणारी व शिवाजीनगरकडून औंध, सांगवी, पिंपरी चिंचवड, हिंजवडीकडे जाणार्या वाहनचालकांनी खालीलप्रमाणे बदल केलेल्या मार्गाचा अवलंब करावा.
शिवाजीनगरकडून गणेशखिंड रोडने औंध, सांगवी, पिपरी चिंचवड, हिजवडी कडे जाणार्या वाहनचालकांनी एबिल हाऊस येथून उजवीकडे वळण घेऊन सरळ रेंजहिल्स, सिफनी चौक मार्गे साई चौक खडकी, डॉ.आंबेडकर चौक बोपोडी सरळ स्पायसर चौक मार्गे ब्रेमेन चौकातुन इच्छित स्थळी जावे. औंध गावाकडून शिवाजीनगर व पुणे स्टेशनकडे जाणार्या वाहनांनी ब्रेमेन चौकातून डावीकडे वळण
घेऊन सरळ स्पायसर जंक्शन, डॉ. आंबेडकर चौक, साई चौक खडकी, रेंजहिल्स चौक मार्गे इच्छित स्थळी जावे. एबिल हाऊस चौकामध्ये रेंजहिल्सकडून येवून उजवीकडे वळण घेण्यास सर्व प्रकारच्या वाहनांना बंदी राहील. गणेशखिंड रस्त्यावरील संगण्णा धोत्रे पथ जाणे-येणेस दुहेरी मार्ग सुरु राहील. गणेशखिंड रस्त्यावरील खाऊ गल्ली मार्गे ओम सुपर मार्केट सर्कलकडे जाण्यासाठी एकेरी वाहतूक करण्यात आलेली आहे. सिम्बायोसिस कॉलेजकडून खाऊ गल्लीतून गणेशखिंड रोडवर येण्यास बंदी राहील.
खासगी ट्रॅव्हल्सच्या मार्गांत बदल
गणेशखिंड रस्त्यावरील उड्डाणपुल य मेट्रोचे बांधकाम पूर्ण होईपर्यंत पुणे शहरातून संचेती हॉस्पिटल चौकामधून गणेशखिंड रस्त्याने विद्यापीठ चौक, औंध मार्गे पिंपरी चिंचवड, हिंजवडी या भागामध्ये जाणार्या आणि पिंपरी चिंचवड, हिंजवडी भागामधून औंध रस्त्याने पुणे विद्यापीठ चौकामधून संचेती हॉस्पीटल चौकामध्ये येणार्या सर्व प्रकारच्या ट्रॅव्हल्स बसेसना 10 फेब—ुवारीपासून सकाळी आठ ते रात्री साडेदहा पर्यंत प्रवेश बंद करण्यात आला आहे. यावेळी ट्रॅव्हल्स चालकांनी जुना पुणे मुंबई महामार्गावरुन हॅरीस बि—जमार्ग पुणे शहरामध्ये यावे. शहरामधुन जावे किंवा बायपास रोड मार्गे कात्रज खडी मशिन चौक मार्गे जावे, असे आवाहन वाहतूक पोलिसांनी केले आहे.
हेही वाचा
