पुणे : स्नेहल-अमितचे लग्न नुकतेच लोणावळा येथे झाले, तेही रॉयल थीमनुसार. ही थीम अनेकांच्या पसंतीस उतरली. सध्या लग्नसराईचा सीझन असल्यामुळे तरुण जोडपी आपल्या आवडत्या ठिकाणी 'डेस्टिनेशन वेडिंग' करण्यास पसंती देत आहेत. 'डेस्टिनेशन वेडिंग'ची यंदा धूम असून, महाबळेश्वर, पाचगणी, लोणावळा, मुळशी, भूगाव, पानशेत यांसह केरळ, गोवा, राजस्थान, गुजरात आदी राज्यांतील विविध शहरांमध्ये यासाठी बुकिंग झाले आहे. इव्हेंट कंपन्याही कामाला लागल्या आहेत. जोडप्यांनी पसंत केलेल्या बॉलीवूडपासून ते कार्निव्हलपर्यंतच्या थीमनुसार लग्न केले जात आहे.
