पुणे; पुढारी वृत्तसेवा : मागील वर्षी दै. 'पुढारी' माध्यम समूहाच्या वतीने सुरू करण्यात आलेल्या 'राईझ अप सीझन 1' मध्ये सहभागी झालेल्या स्पर्धांबद्दल सर्व स्पर्धक, पंच, क्रीडा संघटना आणि प्रायोजक यांनी दै. 'पुढारी'च्या या उपक्रमाचे कौतुक केले होते. या अभूतपूर्व यशानंतर दै. 'पुढारी'ने याही वर्षी 'राईझ अप सीझन 2'चे आयोजन केले आहे.
सर्व वयोगटांतील महिलांमध्ये, मुलींमध्ये विविध क्रीडा स्पर्धांबद्दल उत्सुकता निर्माण व्हावी, त्यांच्यातील क्रीडा नैपुण्य जागृत व्हावे आणि त्यांनी या स्पर्धांमध्ये सहभाग घ्यावा, याचा फायदा त्यांना त्यांच्या करिअरमध्ये व्हावा आणि त्या मानसिकदृष्ट्या, शारीरिकदृष्ट्या तंदुरुस्त राहाव्यात, हाच या उपक्रमाचा उद्देश आहे. त्यासाठी या स्पर्धांमध्ये प्रवेश विनामूल्य आहे, हेदेखील या स्पर्धांचे वैशिष्ट्य.
या अभूतपूर्व यशानंतर दै. 'पुढारी'ने याही वर्षी 'राईझ अप सीझन 2'चे आयोजन केले असून, याची सुरुवात या वर्षी सप्टेंबर 23 मध्ये बुद्धिबळ आणि कॅरम स्पर्धेने झाली आहे. या दोन्ही स्पर्धांना अनेक मुली, महिला स्पर्धकांनी अतिशय उत्तम प्रतिसाद दिला आहे. या दोन स्पर्धांनंतर आता 'राईझ अप सीझन 2' मध्ये महिलांसाठी पुणे जिल्हास्तरीय कुस्ती क्रीडा स्पर्धेचे आयोजन करण्यात आले असून, याही स्पर्धेला अनेक महिला, मुली कुस्तीपटूंचा उत्स्फूर्त प्रतिसाद मिळाला आहे.
दै. 'पुढारी'च्या वतीने पुणे शहर, जिल्हा आणि पिंपरी-चिंचवड भागातील खेळाडूंना प्रोत्साहन आणि खेळाचे व्यासपीठ मिळवून देण्याच्या उद्देशाने या पुणे महिला कुस्ती स्पर्धेचे आयोजन करण्यात आले आहे. या स्पर्धा महाराष्ट्र राज्य कुस्तीगीर परिषद यांच्या संलग्नतेने आणि सह्याद्री नॅशनल स्कूल यांच्या सहयोगाने शनिवार, दि. 28 आणि रविवार, दि. 29 ऑक्टोबर रोजी वारजे येथील सह्याद्री कुस्ती संकुल येथे आयोजित करण्यात आल्या आहेत.
या स्पर्धेत 30 किलो, 35 किलो, 40 किलो, 45 किलो, 50 किलो, 55 किलो, 58 किलो, 62 किलो, 68 किलो आणि 72 किलो अशा दहा वजनी गटांमध्ये होणार आहेत. या स्पर्धेतील प्रत्येक वजनी गटातील प्रथम, व्दितीय, तृतीय आणि चौथ्या क्रमांकाच्या विजेत्यांना रोख पारितोषिके, मेडल्स व सर्व सहभागी स्पर्धकांना सहभाग प्रमाणपत्रे दिली जाणार आहेत.
विशेष म्हणजे या सर्व स्पर्धांमध्ये सहभागी होण्यासाठी विनामूल्य प्रवेश दिला जाणार आहे. महाराष्ट्रात अशा प्रकारची केवळ महिलांसाठी स्पर्धा घेणारा दै. 'पुढारी' हा एकमेव माध्यम समूह आहे. या स्पर्धेला माणिकचंद ऑक्सिरीच हे मुख्य प्रायोजक असून, सहप्रायोजक म्हणून रुपमंत्रा, मीडिया प्रायोजक म्हणून झी टॉकीज, एज्युकेशन पार्टनर म्हणून सूर्यदत्ता इन्स्टिट्यूट आणि सपोर्टिंग पार्टनर म्हणून पुणे महानगरपालिका यांचे विशेष सहकार्य मिळाले आहे.
हेही वाचा
