ट्रॅव्हल फोटोग्राफीची क्रेझ; प्रवास, भटकंती करत फोटोग्राफी करण्याचा तरुणाईमध्ये ट्रेंड

पुणे : नेहाने फेसबुकवर राजस्थानमधील भटकंतीची छायाचित्रे सोशल मीडियावर पोस्ट केली आणि तिने टिपलेली काही छायाचित्रांची विक्रीही झाली….नेहाप्रमाणे सध्या अनेक तरुण छायाचित्रकार पर्यटनावर आधारित छायाचित्रणाकडे वळले असून, त्यांच्या पर्यटनावरील छायाचित्रांना सोशल मीडियावर पसंती मिळत आहे. 20 ते 40 वयोगटातील छायाचित्रकार ठिकठिकाणी भटकंती करून अशी छायाचित्रे टिपत असून, इन्स्टाग्राम, फेसबुक, टि्वटरवर लेह-लडाखपासून ते केरळपर्यंत…दुबईपासून ते मालदीवपर्यंत…अशा विविध ठिकाणी भटकंती करून टिपलेल्या छायाचित्रांना प्रतिसाद मिळत आहे. अनेकांसाठी पर्यटनावरील छायाचित्रण करिअरचे माध्यम बनले आहे.

राज्यातील अनेक तरुण छायाचित्रकार पर्यटनावरील छायाचित्रणाकडे वळले आहेत. तर पुण्यातील 25 टक्के तरुण छायाचित्रकारांचा कल याकडे आहे. आपल्या जगभरातील विविध पर्यटनस्थळांची माहिती पर्यटकांना मिळावी आणि आपली भटकंतीची आवडही जपली जावी, या उद्देशाने अनेकजण पर्यटनावरील छायाचित्रे टिपत आहेत. महाराष्ट्रातील गडकिल्ले असो वा ऐतिहासिक स्थळे…केरळमधील समुद्रकिनारा असो वा राजस्थानमधील वाडे…हे छायाचित्रातून टिपले जात आहेच.

त्याशिवाय विविध देशांतील पर्यटनस्थळांची छायाचित्रे टिपून ती अधिकृत संकेतस्थळे, फेसबुक, टि्वटरवर अपलोड केली जात आहेत. त्याशिवाय इन्स्टाग्राम रिल्सवरही ही छायाचित्रे ट्रेंड करत आहेत. छायाचित्रांच्या विक्रीतून छायाचित्रकारांचे अर्थाजन होत आहे. पुणे फोटोग्राफर्स अ‍ॅण्ड व्हिडिओग्राफर्स असोसिएशनचे अध्यक्ष अभय काप्रे म्हणाले, सध्या पर्यटनावरील छायाचित्रणाकडे सर्वाधिक कल आहे. देश-विदेशात भटकंती करून तेथील छायाचित्रे टिपून ते सोशल मीडियावरील अपलोड करत आहेत.

तरुण छायाचित्रकारांना पर्यटनावरील छायाचित्रणासाठी ट्रॅव्हल कंपन्यांकडून प्रायोजकत्वही मिळत असून, ट्रॅव्हल कंपन्यांनी सुचविलेल्या डेस्टिनेशवर जाऊन तेथील छायाचित्रे टिपून छायाचित्रकार सोशल मीडियावर अपलोड करतात. या छायाचित्रांनाही प्रतिसाद आहे. त्यातूनही छायाचित्रकारांना चांगला आर्थिक मोबदला मिळत आहे.