तळेगाव ढमढेरे(पुणे); पुढारी वृत्तसेवा : शिक्रापूर (ता. शिरूर) येथील पाबळ चौकातील बांदल कॉम्प्लेक्सच्या इमारतीतील दोन दुकानांना शनिवारी (दि. 5) पहाटे 3 वाजेच्या सुमारास भीषण आग लागून दोन दुकाने जळून खाक झाली. यासह एका मेडिकलचे काही प्रमाणात नुकसान झाले. पुणे महानगर प्रदेश विकास प्राधिकरण व रांजणगाव औद्योगिक वसाहतीच्या अग्निशमन दलाच्या दोन तुकड्यांमुळे आग नियंत्रणात आणण्यात यश आले.
शिक्रापूर येथील पाबळ चौकातील बांदल कॉम्प्लेक्सच्या इमारतीतील एका केक शॉपला पहाटे 3 वाजेच्या सुमारास आग लागली. काही वेळातच आगीने मोठा पेट घेत शेजारील एका फोटो स्टुडिओला वेढा घातला. घटनेची माहिती मिळताच पोलिस हवालदार शंकर साळुंके, संदीप कारंडे, शिवाजी चितारे, होमगार्ड वैभव बिडकर, उद्योजक बापूसाहेब बांदल, सदाशिव पुंडे, दत्ता कवाद, अतुल सासवडे, विक्रम ठाकूर आदींनी घटनास्थळी धाव घेतली. दरम्यान, आगीने रौद्ररूप धारण केले होते. याबाबतची माहिती पोलिसांनी तातडीने पुणे महानगर प्रदेश विकास प्राधिकरण व रांजणगाव औद्योगिक वसाहतीच्या अग्निशमन दलांना दिली.
या वेळी इमारतीच्या तिसर्या मजल्यावर काही महिला असल्याचे निदर्शनास आल्याने पोलिस हवालदार शंकर साळुंके यांनी तातडीने वर जाऊन महिलांना सुरक्षितपणे खाली आणले. काही वेळातच पुणे महानगर प्रदेश विकास प्राधिकरण व रांजणगाव औद्योगिक वसाहतीच्या अग्निशमन दलाचे नितीन माने, महेश पाटील, प्रशांत चव्हाण, प्रकाश मदने, सुरज इंगवले तसेच रांजणगाव औद्योगिक वसाहतीच्या अग्निशमन दलाचे रितेश गायकवाड, अमोल गायकवाड, किशोर सांगळे, भाऊसाहेब बागूल यांनी घटनास्थळी धाव घेत आग आटोक्यात आणली.
मात्र, आगीने दोन दुकानांना वेढा घातल्याने केक शॉप व फोटो स्टुडिओच्या दुकानांचे पूर्णपणे नुकसान झाले, तर केक शॉपशेजारील एका मेडिकलचे काही प्रमाणात नुकसान झाले. या आगीमध्ये तब्बल 5 लाखांचे नुकसान झाल्याचा अंदाज वर्तविला जात आहे. ही आग शॉर्ट सर्किटने लागली असावी, असा अंदाज वर्तविण्यात येत आहे.
